Geduld bringt Rose

Mir dräffe uns frieh am Morge mit unsere Passagier und faare ins Äntlibuech. Dr Meteorolog het vorussgsait, ass in däre Region sich dr Näbel sotti bis am Niini uffleese. Yygans Äntlibuech gseen mir aber, ass immer no e diggi Subbe dr Himmel verdeggt. Drumm dien mir in ere Tankstell uns e Kaffi mit Gipfeli gnämige und konsolidiere die verschiidene Webcams. Iber em Näbel isch s’scheenschte Wätter. No neme wytere Delifon mit dr Meteo geen mir drfo uss, ass mit gege die halber Zääni kenne starte. Drum faare mir no Schüpfheim und sueche uns e geaignete Startblatz und beraite dr Ballon fir e Start vor. Immerno warte mir vergäbets uff die erschte Lecher im Näbel. Erscht gege die halber Elfi gseen mir die erschte Lecher und denn goot’s aber seer gschnäll und dr ganzi Himmel isch ändligg blau. Mir stelle dr Ballon uff und starte mit e bitzeli boggigem Wind. Aber scho gly iber em Bode isch es widder Windstill und mir stiige wyter’s mit em Zyyl uff 2500 müM dr erwarteti Südoschtwind ussnitze und in Richtig Huttel z’faare. Unter uns fliegt e Superpuma d’Lyt zem Fliegerschiesse uff d’Axalp. Mittlerwyyle hän mir e wunderbari Alpesicht. Me gseet vom Säntis, iber e Pilatus, bis zer Jungfrau und wo mir unseri maximali Raisehechi erraicht hän gseet me im Hintergrund au dr Mont Blanc. Mir faare genau uff Huttel zue und singge no fascht ainehalb Stund ab. In der untere Schicht drait der Wind und mir faare in Richtig Norde. D’Birsigratte schigge mir no Gondiswyyl. Derte mien mir en-ere Wulgge usswyche und stiige nommol. Vor Reisiswyyl singge mir uff Baumhechi ab, um e geaignete Landeblatz z’sueche. Dr Noochfaarer mäldet, ass bi iim unde uff dr Stroos braggtisch windstill isch. Doch mir wärde laider zimmlig gschnäll iber e Wald driibe und so faare mir dief wyter’s, um hinter em Wald im Windschatte z’lande. Wo mir dief iber em Fäld faare, nimmt aber dr Wind zue und so mien mir dr Ballon laider schnällentleere, damit mir nit z’nooch an d’Baim kemme. Dr Korb setzt aimool uff und bym zwaite Mool isch gniegend Luft dusse, ass dr Ballon sich ableggt. Drby git’s bi uns im Korb aber e glaini Schytterbiigi. D’Birsigratte isch sofort zer Stell und mir pagge dr Ballon zämme. No däm mir unseri Passagier in Ballonadelstand erhobe hänn, faare mir in e Baiz und genämige uns e feini Uffschnittplatte. Eso findet e scheeni Herbschtfaart iir Ändi.