Mir dräffe uns in Aesch mit de Passagier und faare no Dittinge uff e Flugblatz. Derte stelle mir die baide Balleen uff und starte am  Säggsi zer Faart. Unseri Passagier gseen scho gly iiri Haimet, denn si kemme uss em Nochberdorf Röschänz und dr Pfarrer vo Dittinge lytet sini Scheefli zem Näscht uss. Iber Zwinge liggt no s’obligate Näbeli und mir stiige ganz langsam Hecher. Dr Luc mit em Baloise Ballon verlangt freygoob vom Tower Basel fir uff 6000 Fuess, mir derfe aber numme bis 4000 Fuess styyge, will d’Easyjet flyssig am Starte isch. No ebbe 20 Minute derfe mir aber denn uffstiiege und so faare mir in Richtig Aesch und Hoobel (Hochwald). Mir hän jetzt e wunderscheeni Sicht uff Basel und die ganzi Region. Im Weschte liggt’s dr Daalchessel vo Délémont und me gseet scheen s’daal vom Doubs wo mit Näbel gfillt isch. Iber Hobel stiggt dr Luc fir e Zwischelandig ab und mir faare wyter’s in Richtig Seewe und Lupsige. No dämm mir iber Lupsige uss sinn, singge mir ab und Verabschiibe uns vom Tower Basel. Mit ere Biiseschicht dribts uns zrugg no Büre aber ganz unde isch es no sehr Windstill. Ganz langsam faare mir iber d’Baim und sueche uns e Landeblätzli. Es Reh luegt uns ebbis rootloos aa und verschwindet denn im kornfälb bym näggschte Brennerstooss. Dr Wind am Bode isch sehr variabel und so goot’s emool uff die linggi und denn widder uff die rächtig Sytte vomene Waldstraiffli wo mir driber hänge. Schlussändligg stiige mir nommool e bitz hecher und faare zem Wald uss und setze den sanft uff eme Fäld uff. No zwai drey glaine Umwääg findet dr Tony, unsere Noochfaarer denn au zu uns und mit phagge alle zämme. E wunderscheeni und langi Faart vo 2 ½ Stund goot eso z’änd.