Dr Start in d’Ballonwuche Flims 2021 isch glyggt. Mir dräffe uns zem Briefing uff em Startblatz und bikemme vom Wätterfrosch Peter die letschte Informationen. Mit de Vorussage vo iim, blaane mir e Faart ins Prättigau. Mir beraite dr Ballon fir e Start vor und bikemme vo dr Esther die uns zuedailte Passagier. De baide Dame stelle mir unser Team vor und informiere sii iber s’Verhalte im Korb. Am Zää ab Achti hebe mir bi staalblauem Himmel ab und faare zerscht emool dief iber Flims. Schliessligg selle d’Flimser jetzt au wisse, ass d’Balleen dr Himmel fir die Wuche buent ziere. Denn feen mir aber mit em Uffstiig aa und me gseet scho bald dr Gaumasee und Tschingelherner mit em Martinsloch. Wärend em ganze Uffstiig stehen mir no iber em Startblatz und erscht wo mir iber d’Kretehechi uss kemme, nämme mir Gschwindigkait uff. Uff 3500 müM hän mir denn scho 30 km/h in Richtig Prättigau druff. E Rundumbligg zaigt uns im Norde Kurfirste und dr Säntis, im Siidoschte d’Berninagrubbe und gen Weschte gseet me bis zem Mont Blanc. Also aifach e geniale Start in die Wuche. Mir schigge unseri Nochfaarer no Landquart und ins Prättigau. Via Kunklerspass und Calanda goot’s denn iber s’Rhydaal nerdlig vo Chur. Mir gseen jetzt schen uf d’Länzerhaide iine und au s’Schanfiggerdaal no Arosa liggt zu unsere Fiess. Denn faare mir iber d’Krete ins Prättigau yy und blaane dr Abstiig kurz vor Küblis. Rassig singge mir ins Daal yy und fange dr Ballon iber dr Burgruine Strahlegg ab. Ganz langsam driibe mir in Richtig Fideris und setze näbe dr Badi vo Fideris zer Landig aa. Das isch aber e druurigi Glungge, wo eher no ere Fangophaggig als e Badi ussgseet. No däm mir iber e baar Rindvycher faare, setze mir sanft näbe nem Buurehoof uff. Unseri Nochfaarer sin au bald zer Stell und mir legge dr Ballon zämme. Bym Zruggfaare keere mir in Malans yy und stosse uff die scheeni Faart aa.
