Bi beschte Bedingige dräffe mir e Ehepaar, wo mit iire Kinder e gmainsami Ballonfaart mechti mache. Mir faare im norde vo Diegte uff e gmaiti Wiise, wo scho zwai Kolleege flyssig dra sin, iir Balleen zem Start berait z’mache. Au mir spugge in d’Händ und leege loos. Wärend mir am Aabloose sin, starte die baide andere Balleen und zää Minute speeter sin au mir startglaar. En anders Ballonteam isch ebefalls uff em Blatz yydroffe und no dämm mir mit ere Thermikableesig z’kämpfe hän, starte mir zaggig und faare ziigig in richtig Diegte. Uff 1000 Meter iber Meer wird dr Wind stabiler und so faare mir mit 15 km/h no Siide. Via Kärnerkinde und Wisebärg faare mir iber dr Jurasiidfuess. Wunderbar gseen mir wie-ne Märklinyysebaan unter uns dr Rangierbaanhoof vo Olte. Uff dr andere Syte spait dr Kieltuurm vo Gösge e Dampfwulgge uss. Mir singge jetzt e glai weeneli diefer und faare genau uff d’Deponie vo Köllige zue. Die baide Balleen vor uns zaige uns guet aa, wo mir ebefalls durefaare wärde. Ai Pilot mäldet, ass wyter vorne dr Wind ganz langsam wird, aber wo mir an däre stell aaglange, faare mir immer no konstant mit 15 km/h. Dr wind drait mehr ins Taal yy und so entschaide mir uns wyter’s bis Triengge z’faare. Kurz vor Triengge singge mir uf Baumheechi und mien nommol ebbis stiige, will e Buurehof mit Resser vor uns isch. No dämm mir dä iberquert hän, faare mir e Meter iber Bode, bis mir uff em glyche Fäld, wo aine vo de andere baide balleen glandet isch, abhogge. Gschnäll pagge mir alles zämme und stoose uf e scheene Familieussfluug aa und erhebe unseri Passagier in Ballonaadelstand.