No vyyle Aalaif isch es ändligg sowyt. Fascht vollzäälig faare d’Birsigratte gschpannt no Willisau, zem dr neyi Ballon yyzweye. No fascht zää Joor, wo mir fir d’Migros hän derfe mit em Ballon unterwäggs sii, git’s jetzt e gresere Wäggsel. Es frait uns usserordendligg, ass mir in Zuekumft derfe als Botschafter fir d’Miini Region Margge vom Coop uffdrätte. Ebefalls het dr Thomas sy neywidderuffbaute Ballon drby, ebefalls zer Jumpferefaart. Mir leen die baide Balleen näbe-n-em Schiitzehysli vo Ettiswyyl zem Sagg uss und feen mit de Vorberaitige aa. Wo die baide Balleen steen gits e glains Fottoschuuting und wärend unsere Droonepilot flyssig filmt, starte mir zer Jumpferefaart. Ganz gmächlig stiige mir uff und kemme in die Erwarteti Biisestreemig. Es het scho vyyli Balleen in dr Luft, wo uns zer erschte Faart gratuliere und immer „guet Land“ winsche. Im Siide gseen mir scheen in d’Alpe und mir faare in’s Ämmidaal yy. Mir schigge d’Birsigratte no Gondiswil, damit mir derte e Zwyschelandig mache kenne und mir mit dr Droone nommol gueti Blidli schiesse kenne. Mir singge iber dr Hauptsross bi Gondiswil ab und setzt in eme Dääli näbe-n-em Bächli sanft uff. D’Birsigratte steen scho uff dr Hauptstroos berait und mir wäggsle d’Passagier, damit alli emoole hän derfe im neye Ballon mitrytte. Mir dimple ganz dief um e scheene Baum umme und es wärde Gigabytes an Foddeli gschosse. Wo au dr Thomas widder startet, stiige mir nommol uff 1300 müM und gniese dä wunderscheeni Summermorge. No insgeammt zwai Stund, halte mir no enere guete Landeglägehait ussschau, damit mir au mit eme zimpftige Apéro und Champagner uff die baide Balleen kenne aastosse. Mir gseen vor uns dr Tower vo dr Liftfirma Lüthi und mir entschaide uns fir e Ändlandig uff em Fäld hinter dr Firma. Mir singge dief iber d’Baim aabe und nodämm mir eme Raiher sy Zmoorge vermiest hän, setze ganz sanft uff. No nem Zämmeleege wärde mir vom Huuswart Fritz yyglaade, unser Apero im Garte vo dr Firma abzhalte. Näbe-n-em Weyer mit eme Päärli Schwän druff, stosse mir zimpftig mit Champagner aa und leen so die Faart z’Änd goo.