Wo mir uns am Fryttig uff e Wäg no Flims an d’Ballonwuche mache, rägnets in Streeme und wo mir no Chur dr Hang uff kemme, foots au gly scho aa schneye. Aafangs Flims erwartet uns au scho e verschneyti Landschaft wie im Winter. Am Willkommensapero wisse aber alli, ass es e schwirigi Wuche zem Faare kennti gä, will d’Prognose bis mitti Wuche beschaide ussgseen. Am Samschtig Zoobe aber vermäldet unsere Wätterfrosch Peter, ass es am Sunntig eventuell kennti rächtzyttig uffdue und e Faart meglig siigi. Mir dräffe bi scheenschtem Wätter am halber Achti uff em Startblatz yy und beraite uns fir e Start vor. Am viertel ab Achti hebe mir zer erschte Faart als Eereballon vo dr Ballonwuche ab. Mir gniesse zerscht emoole d’Faart iber de Huusdächer vo Flims. Es selle alli do oobe wisse, dass jetzt dr Himmel de Balleen gheert. No zwanzig Minute aber feen mir mit em Uffstiig aa. Mir hän e gewaltigi Sicht uff die verschneyte Bärge. Ab 2500 müM kemme mir in die erwarteti Siidweschtstreemig und faare iber e Flimserstai und Alp Bargis em Ringelspitz entgege. Uff 3500 müM hän mir e scheeni Faart mit bis zu 40 km/h. Unter uns kunnt hinter dr erschte Kreete dr Gigerwaldstausee fire und mir gsen ins Vättisdaal und uff Bad Ragaz aabe. Mir schigge unseri Noochfaarer no Landquart und blaane e Faart bis in d’Region vo Buchs im Rhytl. No dämm mir Bad Ragaz iberquere, singge mir iber em Rhyy ab und faare uff ca. 1600 müM s’Rhyntl drab. Es goot iber e Luziesteig ins Liechtestainische, und wyters no Sevele. Mir hän immerno 40 km/h druff und schigge d’Birsigratte no Grabs, wo mir d’Ändlandig mechte mache. Mir feen aa singge, uff 1200 müM schittlets uns aimool und drno stehen mir und singge fascht Faadegraad obenabe. No langsamer kurzer Faart iber e baar Fälder setze mir sanft uff eme Fäld uff. D’Birsigratte sin sofort zer Stell und mir beände esoo e wunderscheeni Faart. Jetzt sin mir gschpannt, was die Ballonwuche no bringt.
