Letschti Oobefaart

Laider ruggt’s Ändi vo dr Ballonwuche in Flims necher, denn fir am Sunntig isch beraits dr näggschti Rääge aagsait. Bi schenschtem Wätter starte mir zer letschte Faart in Flims. Will sich d’Passagierlischte vo dr Esthi uffgrund vo de vyyle abgsaite Faarte enorm verlängeret het, pagge mir dr Chratte voll und geen mir fimf Passagier in d’Luft. Zerscht schlyche mir dief iber de Huusdächer dr Hang uff in Richtig Talstation vo dr Foppabaan. Laider kemme mir doch eschtlig vo dr Baan, was d’Gfoor mit sich bringt, ass mir vom dr Thermik bym Flimserstai aazoge wärde. Drumm stiige mir rasch hecher und finde e ganz e schwachi Streemig, wo uns zem Startblatz zrugg bringt. Mir faare iber d’Startwiise uss und singge denne uff Hechi vo de Huusdächer ab und faare genau in richtig em Zyyl uff dem Startblatz. E andere Ballon verpasst ganz gnapp s’Zyyl und wird vo sine Nochfaarer am Saili uff d’Wiise zooge. Mir wänn das besser mache, aber genau denn wo mir d’Huch wo dr ander Ballon gha hätte kenne bruche, wäggslet s’Windsystem vom Tal- uff Bärgwind. Mir faare wenigi Zentimeter an de Dächer und Kemmi verbyy und lande bym Schuelhuus vo Flims. mir wärde fraidig vo dr Ursle in empfang gnoo und d’Birsigratte hän au nur e Katzesprung bis zu uns, liggt doch dr Startblatz numme grad fufzig Meter näbedraa. No ainere Stund beände mir e scheens Oobefäärtli und pagge alles zämme. Mir mien uns e bitzeli beaile, will dr Bus fir zem Schlussoobe scho bald faart. Aber es Gleesli Champagner mit unsere Gescht leen mir uns nit nää. Am Schlussoobe erfaare mir, ass mir dr Wettbewärb mit unserem Markerabwurf bi dr erschte Oobefaart mit 1 Meter und 95 Zentimeter gwunne hän. Fraidig derfe mir e ganzi Chratte voll St. Galler Spezialitäte vo dr Nicole in Empfang nää.