Es goot so langsam aber sicher em längschte Daag zue, das bedydet fir uns Balleenler, frieh em Näscht uss. Vorallem, wenn mir no e rächt’s Stiggeli mien faare. Denn hitte hän mir Gescht us em Äntlibuech bi uns im Korb und drumm geen mir ins Luzärnische go faare. Mir hän mit lokale Kolleege delifoniert und by dr Chommle ab gmacht, das liggt kurz vor Berominschter, wenn me vo Suursee undeuffe kunnt. Säggs Ballonteams finde sich derte yy und mir laade au unseri baide Passagier d’Julia und dr Peter yy. Numme e kurzes Stiggli wyter’s het dr Jimmy e scheeni frischgmaiti Wiise gfunde, wo mir unseri Balleen zem Start vorberaite. Kurz vor de Siibeni starte mir und wärde sofort vo dr Morgesunne am Horrizont begriesst. Mir faare gege Suursee zue und im Daal vo Triengge liggt no de ganz fyyns Bodenäbeli. Mir styyge heecher und hän jetzt scheeni Faart mit ca. 18 km/h no Weschte, doch umm emool die ganzi Ussicht z’gniesse styyge mir wyters bis uff 1600 müM. D’Rigi und dr Pilatus zaige sich, wie au d’Schratteflue und Aiger, Mench und d’Jungfrau hintedraa. Mir sinn mittlerwyyle iber Suursee uss und singge widder ebbis diefer, damit mir scheen in’s Ämmidaal in Richtig Huttu zyyle kenne. Dr Mauesee liggt wie e Glaasschiibe unter uns und mir faar ins Wauwilermoos yy. Iber em Schloss Kastelen faare mir ins Ämmidaal yy und singge no e glai weeneli diefer. Bi Zell entschaide mir uns fir e Landig im Hauptdaal zwische Zell und Huttu. Es goot wenigi Meter am Hiigelhang entlang  und mir kenneanhand vo mene andere Ballon scheen beobachte wie dr Wind am Bode isch. Mir zyyle uff e Matte hinter eme glaine Wäldli und singge uff Bamhechi ab. Im letschte Momänt gseen mir, odder schmegge mir, ass die Wiise bschyttet isch und faare dorum wyters. Unseri Nochfaarerin isch uff dr Hauptstroos berait um uns in Empfng z’nää. Mir sezze ganz sanft uff ere Wiise ab und draage dr Ballon no e bitzeli wyter’s bis zer Stroos. Derte beände mir die scheeni Morgefaart und phagge alles zämme. Im Aaschluss dräffe mir alli ander Teams und stosse uff das scheene Erläbnis aa.Unser baide Passagier erhebe mir in Ballonadelstand, bivor mir denn dr Ruggwääg aadrätte. E speziells Danggerscheen an Beat und Jimmy, ass mir hän derfe mit Iiine mitrytte.