Mir dräffe uns mit de Passagier in Rothrist und faare no Mättenwil, wo scho e anders Team am Vorberaite isch. Hitte hän mir unter anderem dr Tombolagwinner vom Ooregribler Galaoobe im Korb. Dr Luc drifft mit sym Team kurz druffabe au yy und mir beraite unseri Balleen fir e Start vor. Kurz vor de Siibeni hebe mit bi mystische Bodenäbelschwade ab und stiige langsam hecher. D’Sunne zaig sich au gly und mir gniesse die tolli Farbebracht. Langsam kemme mir in die erwarteti Biisestreemig und mir faare in Richtig Langenthal. Mir stiige noch hecher und d’Richtig drait mee no Siidweschte, iber 1200 müM stellt aber dr Wind total ab und so singge mir widder, damit mir vorwärts kemme. Mir gseen im Siide im Dunscht dr Sämpachersee mit em Pilatus im Hintergrund. S’Kloschter St. Urban liggt scheen unter uns und mir faare in Richtig Mälchnau und Madiswil. Derte gseen mir dr Versuechsturm vo dr Lüthi Aufzüge AG und entschaide uns langsam tiefer z’goo, um uns e guete Landeblatz z’sueche. Mir faare tief iber e glaine Wald und singge denn uff e gmaiti Matte ab, aber mir mergge, ass die Matte doch nit ganz e so eebe isch und so stiige wider hecher und faare iber Kleindietwil no Weinstegen. Derte singge mir nommol ab und im letschte Momänt drait d’Richtig, statt uff die scheen gmaiti Matte, entlang emme Bächli. Mir setze aber vorhär sanft uff und drey Passagier stiige uss und versetze dr Ballon um 50 Meter. Denn stiige alli widder yy und mir nämme nommol e glaine Gump iber dr Bach und lande denn schliesslig doch uff dr aapeilte Wiiese. Unsere Nochfaarer isch sofort zer Stell und mir phagge alles zämme. Dr zwaiti Ballon isch in dr Nochbergmaind glandet und mir dräffe uns in ere Baiz und nämme aine.