Mir dräffe uns mit unsere Passagier und eme wytere Ballonteam in Landquart und faare no Ilanz zem Startplatz. No dämm mir unsere Ballon startberait hän starte mir zer Faart mit Zyyl Davos odder Prättigau. Mir sin grad an dr Gränze vo dr Bewelkig, in Richtig Disentis isch alles bedeggt, während no Oschte zue dr blaui Himmel s’Zepter ibernimmt. Mir stiige hecher und gseen wunderscheen s’Schiigebiet vo Flims, Laax und Falera. Unter uns drängt sich au langsam Ruinaluta (Rhyschlucht) ins Sichtfäld. Wo mir d’Wulggeobgränze im Weschte iberstiige, duet sich vor uns e ootemberaubends Panarama uff. Vom Tödi iber e Mont Blanc und Bernina bis zem Grossglockner, aifach genial. Do unseri Passagier uss em Büntnerland kemme, kenne si fascht jede Gipfel bym Namme. Mir faare iber dr erschti Solarskilift vo dr Wält bi Tenna im Safiedaal und kemme iber d’Krete vom Heinzenberg bi Präz ins Domleschg iine. Will d’Windrichtig doch vyyl mee uss Nordwescht kunnt, singge mir uff 2500 Meter iber Meer, um nach Norde z’korrigiere. Iber dr Faarsicherhaitsaalag bi Rothebrunne stiige mir widder uff 3500 Meter iber Meer und faare in Richtig Valbella. Langsam foot dr Wind in Richtig Oschte aa draie und mir sinn immer e bitzeli am luege, ass mir uff Davos fire kemme. Iber s’Parpaner Schwarzhorn faare mir ins Schanfiggerdaal yy. Unter uns isch die neyi Urdebaan wo d’Länzer Heidi mit em Gigi vo Arosa verbindet. D’Nochfaarer sin mittlerwyle in Davos aako und mälde am Bode windstill. Wo mir d’Krete zum Davoser Daal iberquere drait d’Faartricht immer meeh no Norde und mir mien biss uff 4000 Meter iber Meer styyge, damit mir in Daalmitti kenne korrigiere. Denn goot’s abwärts, mir singge mit iber 7 Meter pro Sekunde ab und kemme ganz in dr Nechi vom Glodige Ai in d’Grundschicht. Mir zyyle e scheens preparierts Schneefäld vor em See aa, aber wärde denn in Richtig Hyser dryybe. Es got dief iber d’Huusdächer und zwische e baar knorrige Tanne dure, bivoor mir unterhalb vo ere Stroos sanft uffsetze. Mir nämme dr Korb no uff’s Stressli und legge dr Ballon ab. D’Nochfaare finde gly dr Wääg und mir phagge alles zämme. Mit eme Gleesli Glepfmoscht stosse mir uff die scheeni Faart aa und erhebe unseri Passagier in Ballonadelstand. Denn lade mir unseri Passagierin grad rächzytig zem Halbfinalspiil vom HC Davos bym Stadion ab und faare haimwärts.