No Davos Frauenkirch

D‘Ballonwuche Arosa kämpft mit schwiriger Wätterlaag. Es Tief schuuflet ai fiechti Luftmasse no dr andere in d’Schwyz. So blybt aigendlig numme d’Hoffnig uff e glains Fänschter, wo s’Ballonfaare zuelosst. Und hitte isch so ne Fänschter. Mir hän ys scho am Voroobe ussgehend mit dr Meteo befasst und hänn e Meegligkait gsee, ass es am Morge kennti e Fänschter vo 3-4 Stund gää. Phunggt Achti goot d’Sunne uff und mit hänn scho blaue Himmel iber Arosa. An de Häng hets no Räschtbewelkig wo sich aber scho glyy uffleest. Am viertel ab Achti dräffe mir uns zem Briefing und au dr Wätterfrosch Peter Pöschl bestätigt unser Yyschätzig. Mir beraite rasch unsere Ballon uff dr Yysblootere bi Maran vor und mache kurz vor em Abhebe nommol Meteo. Webcams zaige im Ruum Davos alles offe, au Flims, Chur und Prättigau zaige sich vo dr frindlige Sytte. E Aaruef bi dr Meteo bestätigt uns, ass das Fänschter sicher 3 Stund hebt und au d’Mässstationen zaige kaini problematische Wind aa. Mir Starte am viertel vor zääni und stiige langsam uff. E traumhafti Scheelandschaft liggt zu unsere Fiess. Mir schiessi flyysig Fotteli vo Arosa und gseen scho glyy, ass es wirgligg bi Davos ääne offe isch. Ab 2500 müM hän mir s’erschte Mool e bestimmti Richtig mit 10 km/h no Oschte. Ab 2700 nimmt dr Wind steetig zue, pletzligg fliege um uns umme Yyskrischtall wo wie duusig Diamante funggle. Aifach dr Hammer! Jetzt faare mir mit 30 km/h in Richtig Davos Frauekirch und mir stiige wyter’s bis uff 3200 müM. Mit däm Wind sin mir glyy im andere Tal, drumm schigge mir unseri Nochfaarer uff d’Pischte no Chur. Mir faare iber d’Bärgkrete, wo dr Wind no ebbis zuenimmt. Aber wo mir ins Tal vo Davos kemme, nimmt är scho widder ab. Mir starte unsere Abstiig iber dr Hauptsroos und kemme praktisch iber däre Stell obenabe. Dieff faare mit iber d’Yysebaan und setze ganz sanft näbe dr Langlaufpischte abb. No dämm mir mit Hilf vo de Schryyner dr Ballon zem Wärgghof drait hän, legge mir en ab und pagge alles yy. E kurzi, aber supertolli Faart goot so z’Änd. Bifor mir dr Langi Wääg zrugg in Aagriff nämme, keere mir im ene Rechtaurant yy und stoosse uff das Erläbnis aa. Jetzt hoffe mir uff e Mittwuch, wo au widder e Fänschterli kennti bringe.