Mit hän das Joor jo sensationells Wätter do in Flims, ab er wie das halt esoo isch mit ere Hochdrugglaag, sin d’Wind in dr Heechi eher schwach. Hitte maint dr Meterolog uff em Blatz, ass es zwor gniegend Luft het, aber kai Wind. Mir beraite uns aber fir e Start vor und begriesse unsere treyschte Passaschier Beat, wo fascht jedes Joor mit uns kunnt ko faare. Mir sin kurz no de Achte startberait und schlyche zerscht emool s’Daal in Richtig Trin Mulin drab. No ebbe ere viertelstund stiige mir e bitz hecher und wo uns dr erschti Ballon mäldet, ass är uff 2700 müM gueti Faart mit 15 km/h in Richtig Chur het, entschaide mir uns ebefalls fir e Uffstiig und e Faart uss em Dalkessel vo Flims usse. Via Alp Mora faare mir in Richtig Kunkelspass und finde e Streemig wo uns ins Vättisdaal yyne drybt. Mir kemme scheen am Gygerswald Stausee verbyy und faare mit bis 20 km/h in Richtig Bad Ragaz. Mit dr Zyt wird’s aber langsamer und wo mir iber d’Krete ins Mülitobel yyfaare, verwirbleds das Windli und mir stehen pletzlig. Mir wäggsle ganz syferli d’Hechi, bis mir wider e dinni Schicht finde, wo uns an de baide andere Balleen verbyy no Badr Ragaz finde. Mir mälde uns bym Flugblatz Bad Ragaz und feen denn no fascht drey Stund Faart dr Abstiig aa. In dr Grundschicht isch es schwachwindig und mir setze sanft uff ere Wiise uff. D’Nochfaarer sin sofort zer Stell und mir phagge alles zämme. Uff em Wäg no Flims geen mir in Jeninz in alte Torggel go Zmittag ässe.