Mir dräffe uns in Aesch frieh am Morge, wo’s no dunggel isch mit de Passagier. D’Nacht isch kurz gsii, will me uns no e Stund gstoole het. Doch s’Wätter isch zue scheen, um dr Daag unter dr Bettdeggi z’verschloofe. Mir faare no Dittige uff e Flugplatz, wo dr Bode no piggelhart gfroore isch und beraite dr Ballon fir e Start vor. Kurz no dämm d’Sunne uffgange isch, sin au mir startberait und hebe ganz langsam zer Morgefaart ab. No däm mir ebbe uff dr Kreetehechi vom Blaue sin, nämme mir Kontakt mit em Fluugplatz Basel uff und verlange d’Freygoob zem Stiige fir uff 2000 müM. Kurz druffabe bikemme mir die und gniesse wäärend em Uffstiig unseri scheeni Sicht uff Basel. Glyy kemme mir scho in die erwarteti Weschtstreemig und faare mit 25 km/h in Richtig Lieschtel. Will mir mit Sicherhait nit mechte no Ditschland faare, frooge mir ebb mir derfe uff 3000 müM stiige. Derte kunnt dr Wind mee vo Nordweschte und mir faare via Pfäffigge und Aesch iber dr Gämpe. Mittlerwyle gseen mir die ganzi Alpeketti und im Mittelland het’s e Huffe anderi Balleen in dr Luft. Mir sin jetzt genau in dr Pischteaggse vom Euroairport, aber derte isch nit vyyl loos und es heert sich fascht e bitzeli drnoo aa, wie wenn mir dr Controller bym Deese wurde steere. Mir kemme jetzt doch rächt vorwärts und uff dr Hechi vo Hölstai singge mir diefer um in Richtig Frick z’koo. D’Sunne stoot jetzt scho hooch und es isch wunderbaar aagnäm warm. Mir peile jetzt d’Region zwische Waislige und Ammel fir unseri Ändlandig aa. No dämm mir iber Waislige uss sin, singge mir ab und wärde doch iberrascht, ass do dr Wind uss Oschte mit iber 25 km/h uns widder zrugg iber s’Dorf drybt. Mir singge wyters ab und kurz iber em Bode wird’s langsamer. Es goot iber e Baumraie und hintedraa setze denn uff ere Wiise uff. Mir kenne dr Ballon zwor stelle, aber fir zem draage bis zem Streesli isch dr Wind denn doch e bitzeli z’stargg. So legge mir dr Ballon ab und bikemme Bsuech vo vyyle Kinder uss em Dorf. Dr Birsigratte mälde mir, wo mir glandet sin und wärend em Warte derfe alli Kinder emoole in d’Chratte stiige. Glyy druffabe kunnt s’Auti in Sicht und mir pagge alles zämme. Mit eme Gleesli Glepfmoscht wird uff die scheeni Faart aagstosse, bivor mir dr Haimwäg unter d’Reeder nämme.
