Will fir dä Samschtigmorge Näbel aagsait isch und au d’Windrichtige seer unsicher sinn, hän mir uns entschiide, fir die Faart ins Mittelland usszwyche. So dräffe mir unseri Passagier bym Motel in Egerkinge und faare gmainsam no Hasle-Rüegsau im Ämmidaal. Mit vo dr Partie isch s’Ballonteam vom Thomas. Mir hän gfroggt bi unsere Frinde vo dr Blaser Swisslube, ebb mir iire Startblatz vor dr Firma derfe benutze und wo mir derte yydräffe, kunnt ebefalls dr Hannes mit em Blaser Ballon z’faare. Mir beraite unseri Ballen fir e Start vor und Starte grad wo d’Sunne im Daal uff got. Mir faare dief mit em Daalwind in Richtig Burgdorf und gniesse die tolli Szenerie. Iiberal het’s in de ainzelne Sytedääler glaini Näbelschwade, im Norde liggt dr Jurasiidfuess unter ere gschlossene Näbeldeggi und im Siide gsenn mir scho die ganzi Alpeketti. Mir faare wyter’s in Richtig Burgdorf und visiere gnau s’Schloss aa. Mit zwai Mool Hechi korrigiere schaffe mir das und mache scheeni Fotteli. Will mir aber nit wän wyter’s uff e Näbel zuefaare, stiige mir hecher um e Siidweschtwind z’finde. Ab 1500 müM hän mir Siidweschtwind, aber laider numme mit 5 km/h. So stiige mir bis uff 3000 müM. und mir hän e fantstischi Ussicht uff die ganzi Alpeketti vom Säntis bis zem Mont Blanc. Dr Thomas isch ebefalls ganz nooch bi uns. No immer hän mir niene mee als 7 km/h gfunde und so stiige mir konstant widder langsam ab, ebb’s nit doch no naimets es Hychli vo ne-me Windli het. Iiber dr Luegg mälde unseri Verfolger, ass si grad unde draa sin und mir singge uff 100 Meter iber em Bode abb, zem e geaignete Ort zem Lande z’finde. Jetzt laufts bletzlig mit 12 km/h und so nämme mir die Glägehait und leen uns in Richtig Walterswyl dryybe und lande derte im Windschatte ganz sanft uff ere scheene Wiise. D’Birsigratte sin aus sofort zer Stell und mir pagge dr Ballon zämme. Im Aaschluss stosse mir mit unsere Passagier aa und erhebe sii in Ballonadelstand. Mit dr Ruggfaart findet die scheeni Faart iir Ändi.