Mir dräffe uns am frie am Morge bi dr Chommle mit unsere Phassaschier und zwai andere Ballonteams. Zämme faare mir uff dr noochi Startblatz und beraite uns fir e Start vor. Das Mool hän mir Gescht vom Coop, wo e Wärbeclip fir d’Miini Region sotte mache. Wo dr Ballon stoot, goot grad d’Sunne am Horrizont uff und es git die erschte Uffnaame. Denn Starte mir und sueche die vorussgsaiti Biisestreemig uff 1000 müM. Statt mit iber 30 km/h faare mir aber numme grad mit 10 km/h gen Weschte. Mir gseen sofort scheen dr Sämpachersee und d’Alpe im Hintergrund. Im goldige Morgeliecht git’s die näggschte Uffnaame vom Plättli, aber denn haisst’s «Zuelänge Frinde und gniesse». Mir faare iber Knuttwil und gseen scheen uff dr Flugblatz Trienggen. So langsam schiesse iberall d’Balleen wie Pilz uss em Bode. Iber em Untermoos vo Buchs iebe mir uns e bitzeli in dr Schwyzer Geografie und erkläre unserem Phassaschier uss Holland, dass das unter uns kaini Bärge sondern numme Hiigel sin. Bi Dagmersellen faare mir ins Wiggerdaal yy und kenne s’Ryych vom Galliker vo oobe beschtuune. Mir singge langsam diefer, will mir scho iber ainehalb Stunde in dr Luft sin und blaane unseri Ändlandig im Ruum vo Pfaffnau. Mir kemme iber e Burghoof in e Dääli yyne und setze zer Landig aa. Wäärden der Landig wärde mir von-ere ganze Horde Rindvycher beobachtet, wie mir wenigi Santimeeter iber s’Maisfäld faare, bivor mir sanft im Gras uffsetze. Uff ere nooche Wiise lege mir dr Ballon zämme und stoosse mit eme Gleesli Glepfmoscht uff die scheeni Faart aa. Vyyle Dangg fir die scheeni Faart und die keschtligi Verpflägig unterwäggs.