No däre wunderscheene Faart am Morge hän mir unseri Fläsche uff dr Ballonwiise gfillt und by-me-ne Mittagässe dr Dixieland Jazzband zuegloost. Am halber fimfi isch denn s’Briefing fir d’Oobefaart gsii und mir hän unseri vier Passagier derfe begriesse. No de Fimfe starte mir und faare mir em Wind in dr Grundschicht dr Hang uff. Dief goot’s iber die nayi Stenna-Iberbauig, wo vo uns dr Iibernamme MS Flims bikunnt. Das ganzi gseet nämmlig vo oobe uss, wie wenn e Grytzfaartdampfer uff Land gloffe isch. Vermuetlig git’s au in Flims en Schettino! Wyter’s goot’s dr Hang druff in Richtig Foppa und mir bikemme Bsuech vo meerere Glaitschiirmflieger, wo-ne Rundi um uns umme draie, bivor si uff dr Wiise unter uns Lande. Will mir nit scho glyy wänn Lande, stiige mir hecher um mit enere andere Streemig widder in d’Daalmitti kenne faare. Und wirgligg finde mir uff 1500 müM  eso-ne Schicht, wo ganz langsam dr’uss lauft. Wo mir widder uf dr Hechi vo dr MS Flims sin, singge mir erneyt ab, um s’glyyche Spiili grad nommol z’mache. Mir faare dr Hang druff, aber dasmool e rächt’s Stigg hecher, ass mir scho bald uff dr Runca Hechi sin. Denn stiige mir widder und will en andere Ballon hecher oobe no ne gschnällere Wind gfunde het, stiige ebefalls uff 1800 müM uffe. Bletzlig faare mir mit iber 20 km/h widder in Richtig Flims Waldhuus. Derte singge mir widder zaggig uff Baumhechi ab und faare via Runca Sura ins Vallarosa yy. E wunderscheeni Felsformation zaigt sich uns, wo sich in däm abglägene Daal vor de Lyt versteggt. Zwai Ballen singge ganz dief ins Daal yyne, aber mir verzichte druff, will mir e ganz e glaine Huuch vo-ne-me Windli hän, wo uns zer Runca Hechi dribt. Vo Tannzipfel zu Tannezipfel kämpfe mir uns voraa und no dämm mir die letschti Tanne iberquere singge mir ab und lande wenigi Meter näbe-n-em Restaurant Runca. Mir mälde unseri Landig de Noochfaarer und draage dr Ballon e baar Meter wyter’s, wo mir iin guet kenne zämmelegge. D’Birsigratte sin gly zer Stell und mir pagge alles yy. Im Aaschluss wird mit eme Gleesli aagstoose und unseri Passagier wärde in Ballonadelstand erhobe. Laider gseets Wätter fir dr Mäntig und fir e Zyschtigmorge nit guet uss. So kenne mir sicher Ussschloofe und am Mäntigzoobe dr Reerugge gniesse.