Es stoot s’Pfingschtwuchenändi mit summerlige Tämperature vor dr Diire und mir dräffe uns in aller Herrgotsfriehi mit unsere Passagier und faare no Tennike uff dr Hornusserblatz. Derte beraite mir unsere Ballon fir d’Faart vor, mit em Blaan ins Val Terbi z’faare. Wo mir scho fascht berait stehen fir e Start, faart unsere Frind Benj au uff e Blatz, zem e Schuelfärtli mit synere Dochter z’mache. Mir starte und wärde scho vo de erschte Sunnestrahle in Empfang gnoo. Ganz gemächlich goot’s in Richtig Hölstein und mir nämme Kontaggt mit em Turm vom Euroairport uff. Do d’Pischte saniert und widder in Betryyb isch, het’s au widder ainigi Flieger wo starte. Drumm bikemme mir z’erscht numme e Freygoob fir bis uff 4000 Fuess. Mir gniesse unserei Ussicht uff s’Baselbiet und drab bis uff Basel mit de Rochedirm. Im Siide gseet me scheen die ganzi Alpeketti und im Mittelland het’s ainigi Kolleege wo au in dr Luft sin. Mittlerwyyle hän mir e Freygoob bis uff 6000 Fuess biko und so styyge mir hecher. Mir hän e scheene Bligg uff Waldeburg und faare in Richtig Wasserfalle. Unter uns bittet dr Pfarrer syni Scheefli in Bättschopf. Damit mir nit z’fescht siidlig an unserem Landegebiet verbyfaare, singge mir widder e bitzeli ab, und hän jetzt genau d’Faart no Corban. Mir schigge unseri Nochfaarer in Richtig Delémont und faare bi Nunnige iber d’Ruine Gilgebärg. Bi Erschwil goot’s iber’s Wälschgätterli ins Val Terbi yyne. Durch nommol e bitzeli singge, hän mir e ideali Windstreemig wo und genau s’Tal druss drybt und so faare mir bis vor Courcelon. Derte beraite mir uns fir d’Landig vor und setze denn sanft uff eme Streesli ab. D’Nochfaarer stehen sofort berait und mir drage dr Ballon ze-n-ere scheene Matte und legge en ab. No däm mir alles yyglaade hän faare mir no Courcelon und genämige uns in dr Gartebaiz e Bier mit eme Blättli.