E mystischi Ballonfaart

Mir dräffe unseri Passagier in Egerkinge in aller Heergottsfrie im diggschte Näbel. Zämme mit em Thomas sym Team faare mir dorum uff Reide, mit em Blaan in Pfaffnau go z’starte. Aber au in Reide liggt no Näbel und so faare mir wyter’s no Albertswyl bi Willisau. Au im Wauwilermoos ligge no ebaar Näbelschwaade, aber die wärde sich glyy mit de erschte Sunnestraale uffleese. Mir beraite unseri baide Balleen vor und starte am zwanzig ab Säggsi zer Faart. Es isch e wunderbaar mystischi Stimmig, mit all däne Näbelfätze und obedriber e fir die Jooreszyt wunderbaar glaari Sicht uff die ganze Alpe. Mir faare zerscht dief in Richtig Weschte iber s’Schloss Kastelen und sin fascht uff dr glyche Hechi wie d’Burgruine Kastelen. Denn aber feen mir mit em Uffstiig aa und mir gseen scho bald, ass dr Sämpachersee, wie au dr Hallwilersee näbelfrei sin. Mir iiebe uns in Schwyzer Geografie und au anderi Ballonteams sin mittlerwyle in dr Luft. Mir faare jetzt mit 25 km/h no Oschte und unter uns liggt dr Mauesee. Mit em Näbeli driber gseet’s aber uss, wie dr greschti Sturm fir e schwääre Seegang wurd sorge. Wyter’s goots via Suursee no Berominschter, und mir kemme fascht genau iber em alte Sändeturm dure. Mir mälde uns bym Flugblatz Berominschter, aber derte sin glaub ych alli no im Näscht. Mir entschaide uns fir e Wyterfaart iber e Baldeggersee yyne und in dr Region vo Müswange z’lande. Denn im Reussdaal liggt immer no Näbel. Mir singge ab und Faare in dr Grundschicht ganz langsam no Norde und setze sanft uff eme Fäldwääg uff. Unseri Nochfaarer sin sofort zer Stell und mir draage dr Ballon zer nooche Wiise und legge zämme. Im Aaschluss erhebe mir unseri Passagier in Ballonadelstand, bivor mir dr Retourwääg widder aadrätte.