No dämm mir am Sunntig laider kaini Ballonfaarte hän kenne mache, sin mir alli ganz gschpannt, ebb’s am Mäntig am Morge no aini git, bivor die näggschti Front kunnt. Als mir uffsteen isch es no dunggel und s’Radar zaigt ainzelni Echos im Norde vo Flims. Aber uff em Wääg zem Startblatz wärde mir von-e-me fantastische Morgeroot empfange und d’Hoffnig styggt, ass es doch no e Faart git. Mir beraite dr Ballon vor und geen zem Briefing, wo dr Meteorolog uns sicheri Bedingige fir e Faart mäldet. Numme d’Wind sin in dr Heche schwach und so isch es nit ganz glaar, wo die Rais aanegoot. Mir stelle dr Ballon uff und Starte am viertelab Achti ganz langsam, will anderi Balleen iber uns sin. Langsam stiige mir hecher und dr Himmel zaigt immer no wunderscheeni Farbe und Liechteffäggt. Braggtisch iber em Startblatz stiige mir uff iber 2000 müM und hän nie mee als e Huch vo me-ne Windli. Ab 2500 müM foot’s wenigschtens e glai weneli aafoo Laufe mit 8 km/h in Richtig Domleschg. Mir stiige wyters und ab 3000 müM hän mir jetzt doch wenigschtens 15 km/h druff. D’Richtig isch aber nit so ideal, will’s genau zer ängschte Stell im Domleschg fiert. Drumm stiige mir wyters bis uff 3800 müM wo mir ändligg e gueti Streemig finde. Mittlerwyyle sin mir scho iber dr Rhyyschlucht, wo scheen in dr Sunne duet lychte. Um uns umme tanze duusigi for Diamante in dr Sunne. Es sin Yyskrischtall wo fir dä scheeni Effäggt die sorge. Mir schigge unseri Nochfaarer, d’Birsigratte, ins Domleschgg no Cazis und mälde, ass mir in dr Region vo Rodels wärde abstiige. Mitti Daal feen mir unsere Abstiig aa, will mir aber unterwäggs Schichte hän wo uns unginschtig dien versetze, effene mir nommol s’Ventil und singge mit 6,7 Meter pro Sekunde. Es bloost zimftig unde uffe, aber es isch richtig soo, denn mir kemme iber eme guete Gebiet zem Lande aabe. Unseri Nochfaarer mälde, ass es am Bode windstill isch. Notyrligg rächzyttig feen mir aa dr Ballon uffzhaize und brämse dodrmit unsere Singggschwindikait ab. Unter uns isch e scheens Zwischebeedeli mit ere gmaite Wiise. Mir setze sanft uff, nodäm mir d’Kieh und dr Muuni uff dr Wiise näbedra begriesst und dodrmit beruhigt hän. E Brachtsexemplar vo neme Muuni und dr Buur kunnt au scho uff d’Wiise, zem sini Tier z’beruhige. No nem Ableege vom Ballon begriesse mir dr Buur und stelle uns iim vor. Är het e grossi Fraid und sait uns no-nem Komplimänt an sy Muuni dr Namme vo-n-em. Alles glaar e soo aine ka jo nit anderscht als Francis haisse!!! Mir sin am zämme pagge, wo e ganzi Schaar vo glaine Gnäggis iber d’Wiise z’burtzle kunnt. Dr Kindergarte het uns als Aaloss gno, zem e glaine Spaziergang zmache. Notyrligg mechte alli emoole in Korb yyne hipfe und so git’s das wunderbaare Fotteli mit 16 Gnäggis im Korb. Im Aschluss bikunnt jede e Pin und e Kläber und au vom Walti e Pin, wo ebefalls uff däre Wiise glandet isch. No-nem Zämmepagge verabschiide mir uns vom Kindergarte und faare zrugg no Flims. Fir Zoobe und am Zyschtigg isch laider Rääge aagsait und dorum s’Briefing abgsait. Mir fraie uns trotzdämm, will’s zem Znacht e Reerugge git und mir dä au mit eme zimftige Schlugg Roote derfe gniesse.