Es isch die erschti Oobefaart fir uns in Flims aagsait. Mir starte mit unsere Passagier erscht no de Halberfimfe, will mir zerscht emoole Blatz bruuche, zem unsere Ballon uffzbloose. No nem Start blybe mir dief und faare iber’s Flimser Schuelhuus dr Hang druff. Mir wärde vo vyyle Lyt uff iire Treasse empfange und bym Hapimaag goot grad e grosse Apéro zänd. Drumm blyybe mir au lieber in dr Luft und faare in d’Stennaschlucht yy. Mir gseen d’Verbindigsbrugg vo dr Umfaarig und faare iber d’Baumwipfle yyne. Uff em Fäld unter uns rennt grad dr Maischter Rainegge drvoo. Mir stiige hecher und gniesse d’Ussicht uff’s Tschingelherner und dr Caumasee. Mir finde laider kai Huuch, wo uns widder in d’Richtig vo Flims wurdi bringe. Es goot ganz langsam in Richtig Murschetg. Langsam gseen mir ins Val la Rosa, mit de ussgwäschene Staisyyle. Aber es hett zwenig Sunneyystraalig, damit mir derte nu kennte druff faare. Mir singge langsam ab und faare iber vyyli Haimetli und Haistegg yyne. Iber Runca Sut goot’s langsam in Richtig dr Stausee Lag Isla bi Murschteg. Unter uns isch zwor e scheeni Wiise, aber das isch laider e Sperrgebiet fir uns Balleenler. Mir faare dief iber e Laitig bi dr Hauptstroos und Lande uff dr Wiise Run dil Prè näbe n-em Flimser Ballon. Mir erfaare erscht no dr Landig, ass dä Egge jetzt au dr Buur vom Sperrgebiet bewirtschaftet, und ab jetzt wisse alli, ass das au zem Sperrgebiet gheert. Aigendlig Schaad, will’s derte seer scheen isch.