Scho Donnschtig und s’Wätter isch immer no bombastisch. Hitte sin seer langsami Wind vorussgsait, weshalb numme e Faart im Daalkessel vo Arosa meglig isch. Mir dräffe unseri Passagier und faare dasmool nit no Maran sondern uff Innerarosa zer Kulmwiise. Vo do isch es e bitzeli aifacher, zem die verschidene Wind uss z’kundschafte und eso e lengeri Faart z’mache. E zwaits Team uss em grosse Kanton gsellt sich zu uns. Mir beraite alles fir e Start vor und hebe am halber Elfi ab. Es fliesst immer no die kalti Luft s’Daal drab und so faare mir in richtig Tschugge Hotel, wo mir fir die Wuche derfe z’Gascht syy. Denn stiige mir zer Bodeschicht uss und gniesse aifach emoole die scheeni Sicht uff Arosa. Wobii so ne Kesselfaart isch fir e Pilot nit numme zem gniesse. Es haisst in jedere Sekunde d’Konzentration uffrächterhalte, will es git meer Stelle in däm Daal, wo me mit em Auti dr Ballon nimme ka bärge, wie sonigi wo das no meglig isch.