Mir dräffe uns mit vier Passagier, fir e Oobefäärtli in Diegte und faare no Eptige, wo mir e scheen gmaiti Matte finde. Bis dert aane wisse die baide Dame aber gar noonig, was si aigendlig erwartet, denn die baide Briedere hän bischlosse, iiri Frindinne hitte z’iiberrasche. D’Iiberraschig, die isch glunge und mir feen aa, dr Ballon fir e Start vor z’beraite. Mittlerwyyle het sich d’Quellbewelkig scho braggtisch uffgleest und mir sin froh, ass mir em Meteorolog am Morge nit glaubt hän. Dä het nämmlig gmaint, ass mir mit vier bis fimf Achtel Bewelkig mien rächne. No-nem Uffstelle starte mir am viertel vor Siibeni zer Faart und stiige langsam zem Dääli uss. Mir gniesse gly scho e scheene Bligg uff’s obere Baselbiet und finde bald dr erwarteti Nordwind, wo uns wird ins Mittelland dryybe. Uff 1800 müM entdecke mir Aiger, Mench und Jungfrau und im Mittelland gseen mir bis zem Sämpachersee. Mit 2000 müM hän mir die maximali Hechi vo hitte eraicht, will aber d’Streemig langsamer isch als unde und d’Richtig au nit grad e Bombe isch, singge mir scho gly widder diefer. Mir faare iber e Hombärg und kemme bi Rickebach ins Mittelland. Unseri Nochfaarer schigge mir no Murgedaal und mir faare bi Bonige iber d’Autobaan A1 und d’Aare. Unter uns kenne mir die rooti Harasseburg vo Rivalla gsee und unseri Faart fiert uns näbe Vordemwald duure no Pfaffnau. Unseri Noochfaarer mälde iire Standort bym Bättschopf vo Pfaffnau und im glyche  Momänt foot dr Paff aa syni Scheefli z’riefe. Genuau unter uns startet dr Kolleg Benj mit sym glaine Katzballon und stiigt uff unseri Hechi. Mir schigge d’Birsigratte no Ebersegge, wo mir e Landeblatz sueche mechte. Mir singge diefer und hän 150 Meter iber Bode immer no e Gschwindigkait vo 20 km/h. No däm mir in e glains Dääli singge gspyyre mir kurz vor em Uffsetze dr Wind vo vorne. Das zaigt uns aa, ass es abbrämst und scho gly sin mir nur no im Schritttämpo unterwäggs. Mir setze sanft uff eme teerte Streessli uff, wo grad e frisch gmaiti Matte dra aagränzt. Mir wärde vo Kinder begriesst, wo aazgsprunge kemme und d’Noochfaarer sin au glyy zer Stell. So pagge mir dr Ballon zämme und stoose uff e wunderscheeni Faart aa. Wär bruucht e Tschutti Wältmaischterschaft, wenn’s soo scheeni anderi Sache unf däre Wält git!