Die letschti Faart vo dr Schwyzermaischteschaft im Haissluftballonfaare in Willisau isch aagsait und mir sin als Fiesta Ballonteam widder mit drby. No nem Briefing faare mir zämme mit andere Teams uff die anderi Syte vo Willisau mir und feen unseri Balleen aa vorzberaite. Scho gly dauche die erschte Wettkampfballeen uff und quätsche sich zwysche uns. Mir stelle unsere Ballon sofort uff und starte, damit die megligscht gschnäll ebefalls kenne goo. Mir faare dief in Richtig Willisau Innerstadt und innert wenige Sekunde sin pletzlig ganz vyyli Wettkampfballeen um uns umme. Mit all däne vyyle Blaserbaleen verliere mir d’Ibersicht, ebb jetzt grad aine iber uns isch oder nit und am Funk isch ai Gschnur. So blybe mir aifach ebefalls dief und faare in Richtig Wettkampf Blatz. Do jo hitte e au s’Schwingerfescht in Willisau dueregfiert wird, streeme e Huffe Lyt dur Stadt zer Arena mit de siibe Sagmäälring. Mir gseen jetzt scheen uff d’Hauptgass, wo vo de baide Stadttoor bewacht wird und im Daal wo vo Menznau här kunnt, faare ganz dief ebefalls Balleen in aim Pullgg uff s’Zyyl zue. Mir gseen, ass sich aine vo de Wettkämpfer kennti unter uns schlyche und mir hätte kai meegligkait rächtzyttig aafo z’stiige, will e Wettkampfballon aifach vyyl schnäller isch. Drum singge mir aifach uff die glychi Hechi, damit das nit bassiert. E bitzeli speeter git uns aine vo dr Wettkampflaitig dure, ass mir iber uns jetzt kai Ballon hän. Mir feen sofort mit rassigem Stiige aa und kenne drby beobachte, wie vyyli iiri Marker ins Zyyl leege. Uff dr Hechi gniesse mir die wunderbari Sicht uff d’Alpe, s’Mittelland und dr Jura. Es isch eso glaar, ass me dr Rocheturm vo Basel seer guet gseet. Mit 15 km/h faare mir in Richtig Sämpachersee und mir schigge unseri Birsigmysli no Mauensee. Mittlerwyle hän d’Wettkampfpilote iiri Faart beändet, aber mir hän no lang nit gnueg. Langsam fiert unseri Faart iber Suhrsee und mir schigge unseri Nochfaarerinne no Berominschter. Mir gseen jetzt scheen dr Färnseeturm vor uns und uff em Fluugblatz wärde d’Sägelfluugi parat gstellt. Ortnigsgmäss mälde mir uns per Fungg derte, aber es git kaine en Antwort. So setze mir e Blindmäldig ab und feen mit Singge aa. Iber eme gmaite Fäld fange mir dr Ballon ab und versueche ganz dief bis zer noche Stroos z’faare. Es het e baar wunderscheeni Hysli do in Berominschter. Vor em Obigstärndli setze mir ganz sanft uff und drage die letschte Meter dr Ballon zer Stroos. D’Birsigmysli sin au sofort zer Stell und mir legge dr Ballon ab und pagge zämme. Drno gits no e Gleesli und mir dauffe unseri baide Passagier, wie sichs gheert. Im Aaschluss faare mir zrugg, damit mir nit d’Rangverkindigung  nit verbasse. Mir gratuliere em Stefan Zeberli zer Vertaidigung vo sym Schwyzermaischtertitel, em Roman Hugi zer Silber- und em Marc Blaser zer Boncemedaille. Au unsere Verainskollege René und Benj e härzligi Gratulation zer tolle Laischtig.