Mir dräffe uns no de fimfe in Aesch und faare ins Laufedaal no Erschwil. Es het im Laufedaal no digge Näbel und erscht no dämm mir d’Klus bi dr Ruine Neu Thierstein passiere, leest sich dr Näbel uff. Im Schwalbenäscht finde mir e scheeni gmaiti Matte und zwai Langoore begriesse uns. Mir feen aa unsere Ballon vorzberaite und wo mir am Kaltfille vo dr Hille sin, taucht au unsere Kolleg uss em Mittelland mit sim Team uff. Mir starte ganz sachte am zävor Siibeni und faare zersch dief in Richtig Ruine. D’Näbelschwaade bilde e mystischi Stimmig, mir stiige hecher und wärde vo dr Morgesunne begriesst. S’Ganze Lauffedaaler Beggi liggt unter eme Näbelmeer, aber gege Oschte zue isch alles offe. Mir hän scho iber dr Kretehechi e flotti Faart no Oschte druff und mir gniesse die wunderbari Morgestimmig. Via Nunnige goot’s no Raigoldswil und sobald dr freii Luftruum iber uns aastiggt, geen au mir hecher und hän eso genau d’Richtig no Ammel. D’Alpe zaige sich im Siide und d’Sicht uff d’Vogese isch ebefalls seer guet. Iber Diegte schigge mir unsere Nochfaarer no Wölflinswil, wo mir dr Abstiig blaane. Die Kalti luft fliesst immer no ab und so faare mir dief no Wittnau fire. Unter uns gseen mir e Reh ääse und no däm mir die letschte Baim iberfaare, singge mir ab um uff ere gmaite Matte z’Lande. Wo mir ganz dief faare begriesst uns dr Landwirt und schänggt unsere Dame im Korb e glaine Maiestruss. Schlussändligg iberquere mir no e baar Bisch und setze uff eme Fäldwäg uff. Dr Nochfaarer isch sofort zer Stell und mir phagge alles zämme. Im Aaschluss stosse mir uff die scheeni Faart aa und erhebe unseri Passagier in Ballonadelstand. Bermerggenswärt isch aber gsii, ass dr Theo mit iber 90ig Joor no so fit isch, ass är ka go Ballonfaare. Chapeau!!