S’Joor goot wyters, wie’s aagfange het. In de Bärge isch traumhafts Wätter aagsait. Mir faare am Samschtig no Flims, an d’GV vom Ballonclub. No nem obligate Fondue Chinoise geen mir aber nit spoot ins Bett, will fir am Sunntig e Ballonfaart aagsait isch. Mir dräffe fimf anderi Teams vor em Restaurant Parlatsch in Trin Mulin und faare gmainsam uff e noche Startblatz und beraite uns fir e Start vor. Langsam hebe mir ab und stiige gmainsam mit de andere Balleen hecher. D‘Wind sin seer variabel, ganz langsam wärde mir iber d‘Riunaulta driibe. Aifach e wunderscheene Aabligg, wie sich dr Rhy in die Felse frisst. Uff 2500 müM hän mir e Drift in Richtig Domleschg, mir stiige aber wyters, will aigendlig wäri‘s no gäbbig wenn mir kennte uff Arosa faare. Mir sin nämmlig ab em Sunntig Zoobe an der Alpine Ballonwuche in Arosa. Mir stiige bis uff 3900 müM und wirgligg mir hän genau Richtig Arosa, laider aber nur mit 3 km/h. Mir entschaide uns soffort widder zem Abstiig uff 2500 müM und fir e Faart no Savognin. Do d‘Windrchtige immer wider ändere, mien mir doch zimmlig zirkle, bis mir iber Savognin dr Abstiig kenne aafo. Hinter em Dorf, oberhalb em Kinderparadies faare mir denn wenigi Meter iber e Laitig und no dämm uns dr Wind ebitzeli zu däre versetzt het, setze mir uff eme Wääg uff. E schneebedeggti Stroos, wo me aber mit em Auti ka aane faare. S‘Zämmeleege isch denn im Schnee trotzdäm um ainiges miehsamer als bi uns im Unterland. Zem Abschluss derf dr Pilot mit em Auti und em Aahänger 300 Meter uf däm Wäg retour faare. Alles doch kai Problem! Mir fraie uns hetzt uff e scheeni Wuche in Arosa.