Mir dräffe uns am friee Oobe in diegte und faare zämme mit eme andere Team zem Startblatz. No nem Uffrischte starte mir zem Oobefäärtli mit Zyyl Zoofige im Mitteland. Scho glyy no-n-em Start finde mir die erwarteti Streemig und faare via Kärnerkinde und Läufelfinge iber e Hauestai. Im Norde gseen mir scheen uff’s Yysebaanviaduggt in Rimmlige und im Siide hän mir e gueti Sicht uff Olte und Aarau. Iber Olte singge mir diefer und kenne em Dryybe vo dr Oltener Chilbi zueluege. Wyters goots an dr Aarburg verby no Rothrischt und Zoofige. Am Hang gseen mir die vyyle Lyt wo am Openair sin und speetischtens jetzt isch glaar, mir Balleenler sin nit die Ainzige wo dä scheeni Oobe gniesse. Die letschte Quellwulgge hän sich nämmlig uffgleest und dr Himmel isch nur no blau. Bi Reide singge mir uff Baumhechi ab und iberqueere en Wald mit zimmlig vyyl Faart. Im Windschatte vom Wald mache mir d’Ändlandig no fascht zwai Stunde in Schüürbärg. No nem Zämmepagge stoose mir mit unsere Passagier und em Landwirt uff e tolls Erläbnis aa und erhebe unseri zwai Frischling in Ballonadelstand.