No dämm’s die Wuche no gschneit het, sage d’Prognose voruss, ass am Samschtig Morge no scheens Wätter sotti syy, bivor die näggschti Front aarollt. So dräffe mir unseri Passagier in Diegte und faare zem Hornusserblatz vo Tenniken. Mir feen aafo unsere Ballonkorb uffrischte und scho bald drifft dr Benj mit sim Team uff em Blatz yy. No dämm mir vor em Start vom Ballon die obligatorischi Jooreskontrolle gmacht hän, feen mir unsere Ballon aafo aabloose. Kurtz druffabe sin mir startberait und hebe ab. D’Sunne goot soebe am Horrizont uff und mir hän iber uns numme stahlblaue Himmel. Mir stiige langsam hecher und finde scho bald die erwarteti Streemig uss Oschtnordoscht. Iber dr Dunschtgränze zaigt sich die ganzi Alpeketti und au gege Norde isch sin no kaini Aazaiche vo dr Front. Mir Faare uff 1900 müM und gniesse die tolli Ussicht. Bis uff e baar wenigi Flägge uff dr Schattesytte vo de Wälder, isch dr ganzi Schnee beraits widder verschwunde. Kai Wunder, denn im Korb isch es aagnääm warm. D’Faart fiert uns iber Wittinsburg, Zeglige und Geissflue in Richtig Aarau. Mir gseen scheen uff Lostdorf, s’AKW Gösge und s’Suhretal druff bis zem Sämpachersee. So langsam mergge mir, ass mir nit die ainzige sin in dr Luft, denn in dr ganze Schwyz stiige au anderi Ballen uff. Mir singge jetzt diefer, damit mir nit in d’Aafluugzoone vo Züri kemme. Unter uns liggt jetzt Aarau, aber es isch no seer ruhig in dr Stadt. Vermuetlig isch dr aint odder ander noonig lang im Näscht! Unseri Nochfaarer mälde iire Standort uff dr Staffelegg und mir schigge sii wyters no Hunzeschwil bi Lenzburg. Dr Benj mäldet, ass es wyters unde e bitzeli gschnäller lauft und so singge mir uff sy Hechi aabe. mit fascht 25 km/h faare mir in Richtig Wohlen. Will’s derte aber mee Hyser als Wiise git, singge mir uff 100 Meter iber de Baim ab und kenne eso mee no Oschte korrigiere. Mir faare iber e Lamazucht und setze denn zer Ändlandig in Dintikon aa. Sanft nämme uns d’Nochfaarer in Empfang und mir trage dr Ballon zu-n-ere nooche Wiise und leege-n-en ab. Au dr Benj landet nur e baar 100 Meter vo uns e wägg. No dämm alles widder verpaggt isch, erhebe mir unseri Passagier in Ballonadelstand. E wunderscheeni Faart findet eso iir Ändi.