Unseri Passagier sin hitte d’Gwinner vo-n-ere Verlosig vo unserem Sponsor Coop Miini Region. Mir dräffe sii am halber Fimfi am Morge frieh und mir faare in d’Chommle bi Beromünster. Derte dräffe mir drey anderi Ballonteams und geen den zämme uf e Startblatz. Am viertel vor Säggsi starte mir und scho ganz kurz drno goot d’Sunne im Oschte uff. Fir dr bevorstehendi Summerdaag isch es eher ungweenlig, dass mir so wenig Dunscht hän und d’Alpe scho vo Aafang aa so guet kenne gsee. Mir faare iber Suhrsee, hänn e wunderbaari Sicht uff e Sämpachersee und dr Pafarrer lytet grad zem Morgegebätt. Unter uns kenne mir zwai andere Balleen bym Start zueluege. Wyters goot’s in Richtig Mauensee und Wauwilermoos. Mir stiige hecher und gseen jetzt vom Säntis bis zu de Fryburgeralpe die ganzi Ketti und au im Norde gseet me dr Schwarzwald wunderbar. Mit 20 km/h faare mir in Richtig Zell. Mir singge ab und dien uns langsam e geaignets Ländeblätzli sueche. E erschti Wiise taucht vor uns uff und mir singge wyter’s ab. Aber uff em Hof näbedra het’s e Schimmel und zwai Pony’s wo so langsam unruhig wärde. Drumm bräche mir dä Landeversuech ab und konzentriere uns uff die näggschti Glägehait. Im Kornfäld unter uns beweggt sich ebbis und gly drno gseen mir e Reh drvo springe. Au e Fuchs zaigt sich kurz zer Begriessig und die näggschti Wiise erwyst sich kurz vor dr Landig als frischt aapflanzt und mir faare zwai Meter ab Bode wyters, Aller guten Dinge sind Drei. Mir setze uff ere scheene Matte uff und drage denn dr Ballon zem Streessli. Mir bikemme dodrby no Hilf vo de Aawooner und so legge mir dr Ballon ab und phagge zämme. Gmainsam stosse mir uff e scheeni Faart aa und mache uns denne widder uff e Haimwääg.