1. Faart ab Arosa

Mit em Ussbligg uf e Ballonwuche mit vyyl schenem Wätter, faare mir ganz gschpannt zem Briefing und entschaide uns no dr Meteo, zämme mit eme Dytsche Team in d’Region vo Montafon zfaare. Drum mache mir no kurz e Flugblaan und faare denn uff Maran uffe, wo fir uns e scheens Fäld fir e Start vorberaitet isch. Wo baidi Balleen näbenander parat sin starte mir gmainsam und faare zerscht e halbi Stund im Daalkessel vo Arosa. Es selle alli Lyt jo au wisse, ass jetzt Ballonwuche aagfange het. Drno stiige mir hecher und finde dr gwinschti Wind wo uns genau no Stgallenkirchen bringt. Mir hän jetzt doch e Tämpo vo 55 km/h druff und so verleen mir scho gly s’Schanfigger Daal. Es goot wyters iber’sPrättigau und mir gseen scheen uff Kloschters aabe. Iberhaupt hän mir e gränzeloses Panorama vor uns. Schneebärge sowyt me luege kaa. Mir hän uns natyrlig bi dr Flugsicherig aagmolde und näbe Madrisa verleen mir d’Schwyz. Iber Gargalle singge mir scho diefer und es wird sofort vyyl langsamer. Uff 2500 müM kenne mir ganz langsam mit 5 km/h genau bis iber Daalmitti faare und denn wie ne Habicht absingge. Es isch nit grad e braits Daal und mir sin s’erschti Mool do, aber am Daalbode gits zwische de Hiser seer vyyli scheeni Wiise zem Lande. Dr anderi Ballon setzt vor uns uff ere Wiise ab und mir zyyle natyrligg die glyche ebefalls aa. Dr Pilot vom andere Ballon nimmt uns scho fraidig in Empfnag und mir lande sanft uff dr Wiise. No-nem Zämmepagge haisst’s warte uff d’Nochfaarer, will die sin erscht grad bi Bad Ragaz verbyy gfaare. Mir sueche e geaigneti Baiz, zem warte und wärde no 15 Minute Fuessmarsch bym Schitzestübli findig. Natyrlig gits fir alli Schlitzel und d’Noochfaare kemme au grad rächtzyttig zem Ässe. Drno faare mir zrugg zem Landeblatz und laade uff, bivor’s widder no Arosa goot. E tolli Faart zem Start vo däre Wuche.