Phingtligg zem kalendarische Herbschtaafang sin d’Wätterverhältnis perfäggt, zem s’Regio Fly In 2017 vo dr Ballongrubbe Basel dure z’viere. No de halber siibne dräffe die ainzelne Teams uff em Hornusserblatz in Tennike yy und beraite iiri Balleen fir e Start vor. am Zwanzig ab Siibeni dräffe sich alli Pilote bim Fuggsballon. Dä macht in däm Joor unsere Presidänt dr Thomas mit em Je t’aime Ballon. Es git e Fuggsjaggd und das bedytet, ass ai Ballon vorab startet und alli ander versueche bi däm sym Landeort meegligscht nooch e Marker abzwärfe. No däm am Briefing alli Informiert sin, startet dr Fuggs und die räschtlige Pilote feen aa, iiri Balleen uff z’stelle. Mir starte als erschte Verfolger und stiige nur langsam iber de Baim hecher und gniesse dr Sunneuffgang. Mit ere ganz schwache Biise goots in Richtig Hölstein und mir luege zue, wie ai Ballon no nem andere zer Waldliechtig uffstiggt. Mir gseen mittlerwyle dr Fuggs seer hoch oobe mit eme Weschtwind drfoo faare und so stiige mir ebefalls gschnäll uf die Heechi uffe. Im Mittelland hets an dr Aare entlang no Näbel, aber sunscht isch bis uff’s Laufedaal alles frey. Mir hän e gueti Sicht uff d’Stadt und s’gnze Rhydaal druff bis no Möhlin. D’Sunne schyynt jetzt dur e Wulggedeggi duure, mit ganz spezielli Lichteffäggt. Mir mergge, ass dr Fuggs vyyl meer no Siide faart und mir versueche meegligscht e Heechi z’finde, wo uns dert aane fiert. No enere Stund foot dr Fuggs zaggig aafoo absingge und und landet scho bald by-m-ene Waldegge bi Weislige. Mir faare iiber s’Zyyl aber uff facht 2000 Meter über Meer und feen aa absingge. Wärend em Abstiig wärde mir aber ainiges no Norde abtriibe und fange dr Ballon kurz iber de Baimwipfel abb. Mir versueche uns esoo no uff die Wiise z’dribble, damit mir derte kennte lande, aber es drait wyters in e schlächti Richtig. So stiige mir widder und faare mit dr Biise via Tecknau no diepflige, wo mir uff ere scheene Wiise lande. Unseri Noochfaarer sin au sofort zer Stell und e ganz liebe Aawooer stoot no bivor mir dr Ballon abgleggt hän mit Bier und Cola am Korb und begriesst uns ganz härzlig. D’Brauerei die befindet sich no im Rohbau, sunscht hät’s sogar e yyhaimisch’s Bier gää. http://www.diepfi.ch. No-n-em Zämmepagge faare mir zrugg und dräffe die andere Teams im Waldhuus in Blätzbums (Birsfelden) zem Apero und sin gschpanntm wär am negschte zem Fuggs aane koo isch. Im dritte Rang isch dr Ruedi gsii und im zwaite Rang dr Max. Gwunne und dodrmit fir ai Joor Hieter vom Wanderpokal hän mir und stoosse drumm uff dä Erfolg mit alle aa. Es frait uns, ass unseri Kollege dr Wäg in’s scheene Baselbiet gfunde hän und mir fraie uns scho uff d’Ussgoob im 2018. Mir hoffe natyrligg, ass es widder emoole e Faart iber d’Stadt git.