Am Unltimo vom Juli zaigt sich s’Wätter nommol vo dr Beschte Sytte. Mir dräffe uns bym Morgegraue und faare zem Flugblatz Ditttinge, wo mir dr Ballon fir e Start vorberaite und unseri Passagier instruiere. Am zwanzig ab Säggsi starte mir zämme mit em Sunneuffgang und stiige langsam hecher. Mir hän e Fluugblaan yygraicht, damit mir kenne im kontrollierte Luftruum faare. Wo mir iber d’Kreetehechi vom Blaue kemme, nämme mir Kontaggt mit em Fluugblatz Basel uff. Es isch derte ainiges loos, d’Lyt wänn alli in d’Ferie. Mir bikemme d’Freygoob fir uff 1500 müM und scho sin mir im erwartete Weschtwind. Mir gseen wunderbaar uff Basel yyne und beobachte, wie d’Fluugi starte. Im Mittelland liggt e glai weeneli Dunscht, aber mir gseen trotzdäm d’Alpeketti im Hintergrund. Mittlewyyle dauche au e baar anderi Balleen am Horrizont uff. Mir bikemme d’Freygoob fir 2000 müM und stiige. Via Duggige und Seewe faare mir uff däre Heechi mit 20 km/h. In richtig Diegte gseen mir bletzlig e Kue in Himmelstiige. Es isch unsere Kolleg Stefu wo mit sym neysch Ballon e letschti Teschtfaart macht. Uff dr Hechi vo Wittschperg singge mit ab und setze gly druffabe sanft uff eme Fäld uff. No nem zämmephagge stoosse mir zämme uff die scheeni Faart aa.
