Wo mir am Morge zem Briefing kemme, isch unter de Pilote e verhalteni Stimmig. Die aagsaite Wind in de hechere Schichte fire via Elm ins Glarnerland, aber in Elm isch e Sperrzone wäge militärische Schiessiebige. No däm aber d‘Faarleitzentrale per Delifon nochegfrogt het, isch usskoo, as s’Militär die Iebig abgsait het. So hän mir aagfange unsere Migros Bio Ballon fir Faart vorzberaite. Am zwanzig ab Achti starte mir zer Faart. Bi uns an Bord sin dr Beat und der Peter, sowie dr Urs inklusive Iberläbensdeggi. Fir was me die alles ka bruuche, verschwiige mir an däre Stell. Mir stiige langsam hecher und faare in Richtig Trin. Unsere Kolleg dr Wilmar mäldet uff 3000 müM e gueti Richtig mit aaständigem Speed. Au mir stiige jetzt schnäller und mien doch guet luege, ass die ainzelne Balleen sich nit in d’Queri kemme. Wo mir 2700 müM passiere, nämme au mir Faart mit 30 km/h uff. An dr Bärgkannte bi Casons gsen mir dr Gian und dr Giachen, odder sunscht e baar vo irne Staiboggkolleege. Mir stiige wyters und uff 3200 müM finde mir unseri optimali Reisehechi mit 50 km/h goots genau noch Einsiedle. Um uns umme kurve d’FA 18 vo dr Schwyzer Armee und iibe dr Luftkampf. E impossanti Sach, das eso vo noochem und uff glycher Hechi kenne mit z’verfolge. Mit Fligelschwängge verabschiide sich die baide Veegel vo uns. Mir faare iber d’Tschingelhöre und kenne s’Martinsloch vo baide Syte bestuune. Unter uns liggt dr Waffeblatz Elm und vor uns kunnt so langsam dr Glärnisch uff uns zue, wo mir genau bim Vrenili’s Gärtli iberquere. Erscht wo mir d’Kante traversiere zaigt sich au dr Klöntaler Stausse unde im Tal. Mir singge ab um e aggtivs militärischs Sperrgebiet z’umfaare. No 20 Minute faart hän mir uns gniegend nach Oschte versetzt damit mir widder kenne styyge und an dr Zone verby faare. Mir beordere unseri Nochfaarer nach Studen am Ändi vom Sihlsee. Mir lande sanft uff ere Kueweid und trage dr Ballon uff eme Wäg zer Weid uss und legge-n-en zämme. In dr Nooche Clubbaiz vo-n-eme Golfplatz beände mir die scheeni Fahrt mit eme Mittagässe. Do drmit iisch d’Faartnummere drey im Sagg und dr Beat het sich aimool mee als Garant fir e Wytfaart bewiise.