Estavayer le Lac? Nai, Wittinsburg is the place to be! S’Regio Fly In vo dr Ballongrubbe Basel stoot widder uff em Programm. So dräffe sich alli Ballonteams am Samschtig Morge in Wittinsburg uff dr Pischte von de Flugdaag wo letschti Wuche iber d’Biihni gloffe sin. Bi scheenschtem Wätter und ideale Windbedingige beraite alli iiri Balleen vor und während em Briefing, startet der BLKB Ballon vo dr Grubbe als Fuchs zer Faart. No däm alli Pilote mit Marker und de netige Informatione versorgt sin, feen alli Teams aa iiri Balleen uffzstelle. Mir starte kurz no de Siibeni mit unserem Ballon und mache uns uff d’Jaggd noch em Fuchs. Dä isch mittlerwyyle mit dr Biise unterwäggs in Richtig Laufetaal. Mir gniesse e wunderbari Sicht uff s’ganze Baselbiet und au glii scho zaige sich d’Alpe. Mir stiige iber d’Grundschicht und finde ebefalls die erwarteti Biise mit 25 km/h. Jetzt gseet me im Siide die ganzi Alpeketti und im Norde liggt unseri scheeni Stadt Basel. Au dr Flugblatz vo Basel erkennt me guet und es wird au Zyt, ass mir uns bi dr Flugsicherig aamälde. Dr Gerry mit em Vista Ballon inbernimmt das fir uns alli und mir bikemme d’Freygoob fir bis uff 4500 Fuess z’stiige. Unter uns liggt s’Schloss Wildestai und s’Birsegg mit Aesch und Rynach kunnt langsam hinter em Gämpestolle fire. Dr Fuchsballon mäldet, ass är im Ruum Brislach syni Ändlandig blaant. Mir sin jetzt uff der Hechi Ponnyranche bi Seewe und scho bald druffabe landet dr Fuchsballon zwische Brislach und Laufe. Mir kemme aigendligg sehr guet uff’s Zyyl aber kenne wäge-n-eme andere Ballon nit schnäll absingge. So gän mir dr Marker uss dr Hechi ab und dä landet mit ebbe 50 Meter zem Zyyl uff em Fäld. Emool luege fir was fir e Rang das längt. Mir hänn aber noonig gnueg und faare wyters iber Laufe. D’Birsigratte, unseri Verfolger, sin beraits unter uns und mir schigge si no Röschenz. Hinter uns gseen mir, ass e harte Fight um dr Siig im Gang isch. Iber e grosse gmaite Wiise stiige mir ab, zem zer Ändlandig aazsetze. Dr Bodewind lauft aber in d’Gegerichtig und so sin mir scho widder iber de Hyser. Mir styyge also nommol hecher und faare das Mool e chli wyter, bivor mir zem zwaite Mool aasetze. Mir lande ganz sanft uff dr Wyse grad näbe-n-em Patrik mit em Metally Ballon und d’Birsigratte nämme uns in Empfang. No-n-em Zämmepagge erhebe mir unseri Passagier in

Ballonadelstand und stosse uff e wunderscheeni Faart aa. Aschliessend faare mir in s’Restaurant Waldhuus in dr Hard und dräffe alli Teams zem Apéro und Rangverkindigung. Gwunne het mit ca. 6 Meter zem Zyyl dr Franz Killer, im zwaite Rang isch dr Patrik Schmidli mit 15 Meter und im dritte Rang dr Tittelvertaidiger Max Imstepf mit 45 Meter. Mir belege mit 50 Meter dr vierti Blatz und leen mit eme Mittagässe dä Aaloss ussklinge. Allne Tailnämer e ganz härzlige Dangg, ass si dr Wääg ins Baselbiet uff sich gnoo hän. Aber ains isch sicher, es het sich gloont.