Am Samschtigmorge dräffe mir uns uff dr Ballonwiise zem Briifing. D’Prognose sait e Faart ins Ryntel voruss. Mir hole unseri baide Passagier, s’Heidi und dr Jgnaz, ab und beraite unsere Ballon fir dr Start vor. Als dritte Ballon starte mir am halber nyni und stiige langsam uff. Es isch jedes Joor widder erneut scheen, die tolli Kulisse vor sich z’gsee. Langsam zaige sich Tschingelhörner und au dr Flimserstai liggt scheen vor uns. Numme dr Ringelspitz liggt unter ere Wulggehuube. Uff 2000 Meter faare mir in Richtig Kunkelpass, wo uns dr Patrick uff 3200 Meter e Gschwindigkait vo 40 km/h mäldet. Damit mir nit in d’Wulgge kemme stiige mir rassig und faare ins Vättistaal yy. Unter uns gseen mir dr Kunkelspass und dr Gigerswald Stausee. Mir singge widder tiefer, damit mir mee in Richtig Norde faare, aber glyy scho wirds uf däre Hechi turbulänt. Dr Thomas näbe-n-uns wird duure gschittlet und mir stiige sofort widder hecher. Iber dr Krete vom Calanda singge mir widder und faare jetzt ruhig mit 40 km/h in Richtig Bad Ragaz. Uf 1700 Meter goots via Jeninz iber Luziesteig no Balzers, wo mir wyters Abstiige. In Buchs vorne gseet me, dass dr Rauch vo me-ne Kamin graad uffstiggt und so wisse mir, ass es am Bode windstill isch. Mir faare aber 300 Meter iber em Bode no mit 50 km/h s’Tal uss. Unseri Nochfaarer d’Birsigratte mälde, dass si in dr Nechi sin. Uff eme Streessli näbe e-n-ere scheene Wiise setze mir sanft uff und beände die Faart no-n-ere Stund und fimfevierzig Minute. Dr Landwirt hilft uns tatkräftig bim Zämmeruume und so sin mir scho bald am Champagner und erhebe unseri Passagier in Ballonadelstand. D’Heidi wird zer Baroness von und zem Vättistaal und dr Jgnaz wird zem Graf zem Gygerswald. Dodrmit isch d’Ballonwuche Flims 2016 ereffnet. Am Nommidaag wird d’Ballonfaart abgsait und mir hän Zyt zem s’Mysli fire z’nää.