Mir sin fir e Wuchenänd z’Bsuech bi unsere Fründe im Simmedaal und natyrligg nimmt me bi guetem Wätter au dr Ballon mit. Am Samschtig am Morge frieh isch Daagwacht fir alli und non-eme glaine Zmoorge faare mir uff Boltige und dräffe derte dr Urs, e wytere Passagier. No im Dunggle feen mir aa dr Ballon vorzberaite und starte am Zää vor Fimfi zer Faart. Mir faare zerscht dief mit em Daalwind in Richtig Spiez, aber doch seer vyyl langsamer als erwartet. Maximal mit 10 km/h goots näben-em Baahnhof vo Boltige duure, bivor’s uns dr Hang uff drybt. Do entdegge mir innere Felswand e Grubbe Gämsi mit zwai Junge, wo versueche dr Felse uff z’glättere. Do mir mit däm Tämpo nit wirgligg vorwärts kemme, feen mir aa z’stiige. Mir gseen jetzt wunderbar s’Simmedaal drab bis zem Thunersee und uff dr andere Syte druff bis no Gstaad. Im Dunscht zaige sich Eiger, Mönch und Jungfrau und mir faare diräggt uff s’Stockhorn zue. Es isch interessant, denn die ortskundige Passagier kenn praggtisch jede Egge in däm Daal. Laider isch au uff 2800 müM nit vyyl mee Tämpo als 15 km/h z’finde, aber wenigschtens stimmt d’Richtig und mir rächne drmit, dass mir in ere Stund iber’s Stockhorn ins Thunerbeggi yyfaare. In dr Zwischezyt stegge unseri Nochfaarer im Simmedaal fescht, denn iberal isch Alpuffzuug und es goot numme im Schritttämpo vorwärts. Und wirgligg, mir faare praggtisch iber d’Bärgstation uff em Stockhorn und blaane dr Abstiig iber Amsoldingen. Es isch halber Achti und s’Militär foot in dr Schiessaalag unter uns uss allne Rohr aafo bellere. Mir starte dr Abstiig und fange dr Ballon 400 Meter iber em See vo Amsoldingen ab. Ganz langsam drybe mir in Richtig Gürbedaal und unseri Noochfaarer sin au beraits in dr Neechi. No dämm mir e Hochspannigslaitig iberquert hän setze mir zer Landig uff ere frisch gmaite Matte aa. Uff de letschte Meter aber keert dr Wind und es goot zrugg in Richtig Laitig. Mir kennte zwar Lande, aber es wäri mit em Auto nit eso praggtisch zemm aane z’faare. Drumm stiige mir nommol hecher und faare wyters no Bluemestai. Derte setze mir zem zwaite Mool zer Landig aa und faare ai Meter iber em Fäld bis mir in dr Nechi vo dr Stroos uffsetze. Im Aaschluss draage mir dr Ballon no bis zer Stroos, wo d’Birsigratte beraits dien warte. No 2 Stund und fimfefufzig Minute beände mir die Faart und legge dr Ballon zämme. Natyrlig erhebe mir dr Urs in Ballonadelstand und stosse uff e gewalltig scheeni Faart aa. Drno goot’s zrugg ins Simmedaal und mit sitze derte im Garte und gniesse en Apéro mit vyyle feine Snacks. Merci Romi und Toni fir das scheene Wuchenändi im Simmedaal.