Gränzelosi Färnsicht

Mir nytze das grosse Hochdrugggebiet um am Sunntig e Faart in de Voralpe z’mache. Dorum stehen mir scho am Säggsi am Morge uff dr Huusdiireschwelle und raiffle mit em Auti loos ins Simmedaal. Scho wo mir uss em Belchedunnel kemme und d’Dämmerig yysetzt gseen mir die ganzi Alpeketti und im Mittelland isch absolut kai Näbel z’gsee. Wo mir vor Spiez ins Simmedaal yybiege, gniesse die erschte Alpegipfel d’Morgesunne. Mir faare no Boltige und dräffe unseri Frinde s’Romy und dr Toni in iirem Haimetli am Jaunpass. By-n-eme Tässli Kaffi odder Tee wird nommol Meteo gmacht und will alli Bärgstatione seer wenig Wind aazaige, entschaide mir uns, anstell vo-n-eme Start in dr Länk hinde, fir e Start in Boltige odder Zwaisimme. Mir sueche e geaigneti Blatz fir zem dr Ballon uff z’stelle. No längerer Irrfaart wärde mir bi dr Ruag findig und feen aa unsere Ballon vorzberaite. Kurz no de Elfe starte mir zu unserer Faart und stiige langsam hecher. In dr Grundschicht fliesst no mit 10 km/h die kalti Luft s’Daal in Richtig Spiez druss. Uff 2500 Meter gseen mir iber die erschte Krete uss und hän e wunderbare Bligg ins Mittelland und uff Aiger, Mench und Jungfrau. Mir hän jetzt e Schicht wo mit 20 km/h no Oschte fiert. Will mir aber erscht in 65 km widder e gueti Glägehait hätte zem lande, stiige mir wyters. Mir durstiige 3500 müM und feen aa unseri Suurstoffaalag in Betriib znää. Mit e baar Naasekaniile schniffle mir e bitz Suurstoff, damit uns nit drimmlig wird, in däre diinne Luft. Uff 4400 Metr hän mir jetzt e Siidwind mit 30 km/h, wo uns mit Sicherhait uss de Bärge use bringt. Mir faare iber e Jaupass und gniesse aifach die fantastischi Usssicht. Es het 360° rundumme nit ai Wulgge und au vo de Flugzyg isch nit ai Straife am Himmel z’gsee. Kurz bivor mir zem Alpeluftruum uss faare, singge mir zaggig unter FL 100 das isch ebbe 3000 müM . Mit däre Weschtstreemig wo mir bym Uffstiig scho kaa hän, faare mir in Richtig Thun und Ämmidaal. Mittlerwyle sin au anderi Balleen in dr Luft. Via Gantrisch und Bluemestai, kemme mir Thun necher. Unter uns gseet me scheen d’Panzerpischte vo dr Kasärne in Thun. Mir blybe scheen siidlig vo dr CTR Bärn und faare iber Steffisburg in Richtig Truebschache. Mir sin jetzt scho iber zwai Stunde in dr Luft und so langsam macht sich e glains Hingerli in dr Maagegegend bemerggbar. S’Romy ibernimmt s’Catering und versorgt uns mit feine Yyglemmte, wo dr Toni am Morge frie gmacht het. Mir versueche jetzt, ebb mir e Streemig finde, wo uns in Richtig Eggiwyl im Ämmidaal bringt. Ganz langsam kenne mir uns e bitzeli no Nordoschte dripple und schigge unsere Nochfaarer dert hii. Kurz vor Eggiwyl entschaide mir uns fir e Abstiig und zer Ändlandig. Es goot iber de Baim numme ganz langsam vorwärts und wo mir dr Wald iiberquert hän lande mir sanft uff ere Langlaufloipe. Die baide Passagier zien dr Ballon zer nooche Stooss und mir schigge dr Standort em Nochfaarer per What’s up. E Schneeschuewanderin begriesst uns und schiesst no e baar Foddeli vo uns. Gly druffabe isch s’Auti au do und mir pagge dr Ballon zämme. Im Bääre vo Eggiwyl mache mir e Halt und leen die Faart by-n-eme Uffschittblättli und eme Bier z’Änd goo.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.