2. Faart ab Arosa

Dr zwaiti Daag vo dr Alpine Ballonwuche Arosa zaigt sich wider mit blauem Himmel. No nem Briefing wo uns dr Meteorolog Peter Pöschl Wind fir e Faart ins Prättigau vorussait, dräffe mir unseri baide Passagierinne bym Obersee und faare uff Maran uffe. Näbe-n-em Restaurant Yysblootere beraite mir unsere Ballon fir e Start vor und starte am zwanzig ab Zääni. Mir faare zerscht e glai weeneli dief und mache scheeni Foddeli vom Hofmaran mit em Arosa Ballon. Denne stiige mir hecher, zem dr Wind in Richtig Prättigau z’finde. Unseri baide Gescht stuune numme, ab däm prächtige Panorama wo sich do iine bietet. Als Yyhaimischi kenne si natyrlig jede Egge und jede Higel uss em effeff. Mir faare uff 2500 müM genau no Jenaz und entschaide uns aber zem hecher z’stiige, damit mir mehr nach Oshte kenne korrigiere. No 15 Minute uff 3200 Meter singge mir denn wider uff die vorigi Hechi ab und faare numme 50 Meter iber dr Krete ins Prättigau yy. Unter uns uff em heggschte Higel stoot e Schneewanderer und mir riefe uns enander zue.  Unter uns liggt s’Schyygebiet vo de Heubärge, aber es gseet doch seer leer uss, uff de Pischte. Dr Walter wo mit sym Ballon e glai weeneli näbe uns faart, entschaidet sich zu-n-ere kurze Zwyschelandig uff eme Schnee Fäld. Wo mir necher zer Daalsoole kemme singge mir ab und rächne drmit, ass uns dr Bärgwind no ins Daal uuse schwemmt. Es isch aber absolut Windstill, trotzdäm dr ainti Hang no voll im Schatte liggt. Drumm stiige mir nommol hecher und faare bis iber Daalmitti und singge den rassant ab. Hundert Meter iber em Bode fange mir dr Ballon ab und sueche es Windli, wo uns s’Daal drab dribt. Mir gseen unter uns binere Burg e Faane wo doch zimmlig Wind aazaigt. Mir singge also uff Baumhechi ab und wirgligg es goot mit 10 km/h in Richtig Fideris. No dr Badi und eme Buurehoof singge mir ganz ab und setze aigendlig ganz sanft uff. Die Wiise isch voll in dr Sunne und drum sin mir doch iberrascht, as dr Bode piggelhart wie Beton isch und so rutsche mir doch no e baar Meter, bis sich d’Hille entleert und mir eso die Faart beände. Dr Korb stoot nur wenigi Meter näbe-n-eme Fäldwäg und unseri Nochfaarerinne sin sofort. Zer stell. Mir faare zrugg no Arosa und sin gschpannt, wievieli so scheeni Faarte mir in däre Woche no derfe mache.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.