Coop meets Migros

Mir dräffe uns am Sunntigzoobe in Diegte mit zwai andere Ballonteams zer Oobefaart. Aine vo de baide andere isch s’Pendant zu unserem Ballon. Wärend mir fir d’Miini Region vom Coop wärbe, het är „Aus der Region für die Region“ vo Migros uff em Ballon. Mir unter de Ballönler sin kaini Konkurränte, sondern aifach gueti Kollege. No nem Start faare mir mit 300 Meter über Grund no Läufelfinge und näbe dr Froburg dure iber e Hauestai. Wyter goot’s iber d’Yysebaanstadt Olte und mir gseen scheen uff e Knotebaanhof mit em beriehmte Baanhofsbiffet. Mir schigge unseri Noochfaarer no Safewyl, während mir hecher stiige, zem en anderi Faartrichtig z’finde. Vor uns nämmlig liggt e lange Higelzuug mit vyyl Wald und wenig Landemegligkaite. So kenne mir e weeneli no Weschte korrigiere und drno mit em Wind iber dr Grundschicht mit 15 km/h no Reide faare. Die andere baide Balleen sin eschtlig vo uns, bivor mir in e Däli vor Raide yydauche. Sofort wärde mir langsamer und mir rächne drmit, ass es am Bode beraits zem Däli ussfliesst, will dr Migros Ballon mit däm Wind uns entgege faart. Mir faare dief iber e Buurehoof bivor’s denn wie erwartet no Weschte drait. Uff ere scheene Wiise setze mir uff und kenne dr Korb no uff e nooche Fäldwäg zieh, bivor mir d’Hille ablegge. Kurz druffabe derfe mir dr Migros Ballon uff dr sälbe Wiise in Empfang nää. Das isch dr Bewyys, dass mir ys doch gärn hän! Mit eme Gleesli Glepfmoscht stosse mir uff e scheeni Oobefaart aa und faare denn zrugg.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.