Voller Erwartige faare mir uff e Startplatz und fraie uns uff e scheeni Faart. Es het am Himmel no Bewelkig aber es het scho ainigi Lugge und mir geen drvo uss, ass d’Sunne die ewäggbrennt. Am Briefing aber mäldet d’Meteo, ass d’Biise no mee Bewelkig kennti in Surselva drugge. Mir mache uns berait fir e Start und beobachte dr Himmel wyters. D’Bewelkig het widder e bitz zuegnoo aber mir entschaide uns fir e Start mit unserne Passagier em René und em Beat. Mir stiige langsam uff und faare iber d’Flimser Dächer. Schlussändlig erraiche mir d’Wulggeuntergränze, aber in Richtig Foppa gseet me d’Sunne schyyne. Wo mir an dr untergränze sin, gseen mir durch unseri Fänschter dr blaui Himmel vo oobe und stiige gschnäll hecher. Iber de Wulgge isch es traumhaft scheen. E stahlblaue Himmel erwartet uns und mir hän e fantastischi Sicht uff d’Bärge um uns umme. Mir stiige hecher und sueche e Schicht wo uns e bitzeli vo de Häng ewägg bringt. Nodisno kemme au anderi Balleen zu uns uffe an die warmi Sunne. Mir faare ganz langsam in Richtig Trin Mulin und dr Rhyschlucht, wyters oobe isch d’Richtig laider ganz schlächt, will alles unter de Wulgge ligt. So gniesse mir aifach d’Sunne und d’Ussicht uff’s Näbelmeer. Iber Trin Mulin gseen mir ainzelni Lecher in der Wulggedeggi und entschliesse uns fir e Abstiig. Sofort sin mir widder unter em Deggel und es wird widder frischer im Korb. Mir leen dr Ballon ganz dief iber e Bode singge und suech e Huch, wo uns zer näggschte Strooss bringt. Nach ainiger Geduld, lande mir schliesslig uff eme Fäld und trage dr Korb zer nooche Stroos, bivor mir dr Ballon ablegge. Mir wärde vo drei Hind begriesst, wo iiri Schoofhärde unter Kontrolle bhalte. In dr noche Nuggibaiz genähmige mir uns e Rundi Nussgipfel und notyrlig wird au dr René in Ballonadelstand erhobe. E spezielli und seer scheeni Faart nimmt esoo iir Ändi.