Mir kemme uff e Startblatz und beraite bi scheenschtem Wätter dr Ballon fir e Start vor. Am Briefing mäldet dr Meteorolog Peter, dass mir e Siidweschtstreemig uff 3000 müM kenne erwarte, aber dass es nit e so gschnäll isch und im verlauf vom Daag eher no abnimmt. Mir sin aigentligg scho startberait, wo em René si Copi z’laufe kunnt, ebb är no bi uns mithipfe kennti. Sii haige zvyyl Passsagier und mechte ebbe au uss em Daal uuse faare. Mir nämme iin in Korb und hebe als erschte Ballon zer Faart ab. Zerscht faare mir no e baar Minute dief iber d’Huusdächer und feen denn aa stiige. Dr Gaumasee liggt unter eme dinne Näbeli, was uff e stabili Wätterlaag losst schliesse. D’Schneegränze isch iber nacht ainiges gstiige und es isch nimmi ganz eso wyss wie an de Vordääg. Uff 2500 müM kemme mir iber die umligende Krete uss und es foot langsam aa laufe. Mir stiige wyters und hän uff 3000 müM genau e Drift ins Prättigau. D’Gschwindigkait isch aber mit 18 km/h doch seer langsam und mir bruchte fascht 2 Stund bis dert aane. Mir kemme via Kunkelspass genau iber e Calanda. In de Wälder unter uns liggt s’Revier vom Wolfsrudel. E andere Ballon mäldet, ass är uff 3800 Meter e Faartrichtig no Schiers im vorder Prättigau het und das mit 25 km/h. Bi Schiers isch d’Daalmitt bedytend necher, als das wo mir hän. Drum stiige mir au uff die Heechi. Mittlerwyle gseen mir scheen uff Chur abe und s’Rhyntl drab bis zem Bodesee. Mir schigge d’Birsigratte no Landquart und mergge, dass unseri Taggtig richtig isch. Will d’Sunne sich hintere dinne Wulggedeggi versteggt, bruuche mir ainiges mee an Gaas. Mir hän dr Ryy scho iberquert und faare iber Valzeuna ins Prättigau yyne. Mir peile Schiers fir e Abstiig aa, will mir drfo ussgeen, ass es im Daal e Schicht mit abfliessender Luft wird gää, ass mir zwysche Schiers und Grüsch kennte Lande. Mir singge bis zu 6 m/s und wärde e weeneli an Gegehang driibe. Langsam feen mir dr Ballon aa abfange und kemme iber eme scheene Graasbeedeli oberhalb vo Schiers obenabe. Im letschte Momänt aber wärde mir iber d’Hyser vo Schiers driibe. Es isch aber ganz langsam und eso leen mir uns uff d’Hechi vo de Husdäche absingge. Zwische dr Schuel und em Spittel kenne mir uff eme Grasflägge näbe-n-em Pargplatz sanft uffsetze. Alli Kinder kemme uss em Schuelhuus grennt und begriesse uns freelig, au d’Leerer begriesse die unerwarteti Physikstund. Mir draage dr Ballon zer nooche Wiise bym Spittel. Au derte bewirgge mir e spontani Wunderhailig. Alli Paziänte kenne pletzlig widder uffstoo und ans Fänschter koo. Mir legge dr Ballon zämme und kenne e anders Ballonteam uff emglyche Blatz in Empfang nää. Drno sitze mir in e noochi Gartebaiz und stergge uns bym ene Plättli. Im Aaschluss hälfe mir eme andere Pilot, will dä nit eso e gäbige Landeort wie mir gfunde het.
