Am erschte Daag git’s scho zwai Faarte. Es zien zwor beraits die erschte hoche Wulgge vor dr nahende Front uff, aber es längt no fir e kurzes Oobefäärtli. Mir beraite dr Ballon vor de gwunderige Auge vo vyyle glaine Gnäggis zer Faart vor und hebe langsam ab. Damit mir aber no scheen vom Daalwind dr Hang uff kenne faare, leen mir uns vo unserer Crew zer andere Syte vom Blatz zieh. Denn goot’s loos und mir faare wenigi Meter iber s’Dach vom Schuelhuus in Richtig Stennatobel, wo beraits zwai anderi Balleen ummeturne . Mir gseen scheen wie d’Auti uff dr Ummfaarig zem Tunnel uss kemme und uff dr andere Sytte wider im Loch verschwinde. Wyter’s goots iber d’Tannewipfel in Richtig Runcca und denn tauche mir ins Val la Rosa yy. Mir gseen scheen uf die scheene Felsformatione und leen uns vo andere Balleen foddele. Mir stiige widder und faare uff die scheeni grossi Wiise oberhalb Murschteg zue. Mir singge ab und setze sanft uff ere scheene Wiise uff. No däm mir dr Ballon e baar Meter bis zer Strooss drait hän, kemme unseri Nochfaarer au scho z’faare. Mir legge dr Ballon zämme und keere zrugg zem Startblatz, wo mir mit unsere Passagier aine zämme pfätze.
