An däm scheene Wuchenänd goot’s uff zer zwaite Rundi. No dämm mir uns mit de Phasaschier dräffe, faare mir wiiderum fir e Start in s’Laufedaal, dissmool aber statt no Dittinge no Erschwyyl ins Schwalbenäscht. Derte wärde mir scho vom Herr Fuggs begriesst und är blybt au ganz wunderfitzig am Waldrand stoo und bestuunt, wie mir dr Ballon dien vorberaite. Erscht bi dr Brennerbroob wird’s em denne z’bränzlig, schliessligg mecht är jo nit als Mischtgratzerli ände. Mir starte am zwanzig vor Siibeni zer Faart und stiige zem Waldegge uuse. D’Sunne begriesst uns scho mir iire warme Straale und mir gseen scheen ins Laufedaaler Beggi iine. Langsam stiige mir hecher, bis mir mit dr Fluugsicherig in Basel kontggt uffnää kenne. Mer bikemme e erschti Freygoob fir uff 2000 müM. E wunderbaari Sicht erwartet uns derte. Mer gseen scho uff Basel yyne und uff dr andere Sytte liggt Dälschbäärg. Dr Wind bringt uns aber nit wie erwartet no Oschte, sondern mir wärde no Norde gege Basel driibe. Drumm stiige mir no wyters, bis mir uff 3000 müM e Drift in Richtig Lieschtel finde. Im Mittelland sin ainigi Balleen in dr Luft, aber in unserer Region sin mir die ainzige. Mittlewyyle hän mir e wunderscheeni Alpesicht. Am Fluugblatz starte e baar Maschiine und fliege um uns umme. Mir sin jetzt doch mit fimfezwanzig Kilometer pro Stund unterwäggs und kemme via Himmelried no Seewe. Dr Controller mäldet uns, dass mir nit uff däre Hechi kenne blyybe, will Ziiri uns dr Blatz in iirem Luftruum nit git. Aigentligg komisch, denn vor de Niine derfe si in Ziiri jo nit vo Norde aafliege und so isch dä Luftruum aigentligg leer. Mir entschaide uns dorum iber Büre fir e Abstiig. In de untere Luftschichte finde mir aber kai geaigneti Streemig wo uns wurdi vo Lieschtel ewägg bringe. Dorum zyyle mir dr Schiessblatz Sichtere aa. Mit 20 km/h faare mir iber e grossi Laitig und denne singge mir uff Baumhechi ab. Uff de letschte Meter wird’s denn ganz langsam. So faare mir wenigi Meter iber e Stroos mit glaine Baimli und lande denn ganz sanft uff ere frisch gmaite Wiise. Unseri Noochfaarer sin gschnäll doo und mir phagge unsere Ballon widder zämme. E scheeni Faart vo anderthalb Stund goot z’änd und mir stosse mit Glepfmoscht druff aa. Bi dr Ruggfaart sueche mir vergäbets in Lieschtel e Baiz wo offe het, das isch halt doch e Provinznäscht, aber in Prattele wärde mir denn findig.
