Hitt stoot e bitz e spezielleri Faart bivor, mir wänn in der CTR Basel starte und das numme grad 6 km vo dr Pischteschwelle vom Euroairport ewägg. Am Morge frieh wird drumm nommol mit dr Flugsicherig abgsproche, ebb das au meegligg isch. Mir dräffe uns am Siibeni in Aesch bi Gott und faare no Scheenebuech, wo mir bym Schitzhyysli e gmaite Straife zem Uffstelle hän. Mir beraite uns fir e Start vor und wo mir berait zem Abhebe sin, lytte mir uff e Tower aa. Dä mäldet, ass sy laider mit ainige Verspeetige z’kämpfe hän und mir dorum no warte mien. No iber 50 Minute und gfyhlte zää Easyjet’s, derfe mir ändligg starte. Fir dr Uffstiig bruchts doch zimmlig vyyl Gas, will’s je hecher mir kemme umso wärmer’s wird. Kurz no nem Start nämme mir Funggkontaggt mit em Tower uff und bikemme e Transpondercode, damit är wais wo mir sin. Sofort hän mir e wunderbare Bligg uff unseri scheeni Haimetstadt Basel und unter uns liggt Hagedaal de Nide und Scheenebuech. Mir stiige uff fimfdausig Fuess und faare in Richtig Hägene. Damit mir nit in d’Aafluugschnaise yyne kemme, verlange mir d’Freygoob fir uff 2000 müM und hänn jetzt e südsüdwescht Wind mit bis zu 35 km/h. Eso kemme mir genau iber dr Flugblatz yyne und do het’s bekanntlig kaini Fluugi in dr Luft. Derte sin si nämmlig am Bode. Mir kenne wunderscheen Starts und Landige mitverfolge und scho glyy faare mir iber e Rhy yyne. Dr Dytschi Blaue mit em Sändeduurm kunnt necher und damit mir nit z’fescht in d’Hiibel yyne kemme, singge mir widder e weeneli und faare eso gen Norde. Iber e Yystainer Klotz, Schlienge und Augge, kemme mir eso no Müllheim. Uff dr Hechi vo Bugginge mälde mir uns bi dr Fluugsicherig ab und singge in d’Grundschicht aabe. Unerwarteter Wyys laufts derte nit in d’Ebeni uuse sondern genau zrugg in Richtig Müllheim – Das aber seer langsam. Eso singge mir uff Baumhechi ab und gedulde uns, bis e geaigneti Landemeegligkait kunnt. Erscht im letschte Momänt gseen mir, ass es vor uns e Hof mit Bygger (Ross) het. Die sin aber scho e bitzeli vom ältere Semeschter und reagiere nit gross uff uns. Numme d’Hiener gaggere wie wild und morn git’s worschynligg kaini Aier. No däm mir nommol e baar Baim mit em Korbbode kitzele, setze mir no zwai Stund Faart sanft uff. E baar Ree begriesse uns und au unseri Nochfaarer sin zer stell. Mir legge dr Ballon ab und phagge alles zämme. Im Aaschluss stosse mir mit eme Gleesli Glepfmoscht aa und erhebe unseri Passagier in Ballonadelstand, bivor mir via Baiz dr Haimwäg aadrätte. E tolli Faart findet eso iir Ändi.
