Mir dräffe uns frieh am Morge in Aesch und faare Richtig Thun ab, denn mir wänn vo derte ins Saaneland faare. In Deitinge gönne mir uns no e Kaffi und faare denn no Steffisburg zu unserem bewärte Startplatz. Derte beraite mir uff dr biggelharte Wiise unsere Ballon vor. Phunggt halber Zääni starte mir unter Beobachtig vo vyyle Zueschauer und dr Schuggerei vo Steffisburg zer Voralpefaart. Bi scheenschtem Wätter zaige sich die erschte Alpegipfel scho uff de erschte Meter ab em Boode. Uff 1000 müM gseen mir scheen uff s’Seebeggi vo Thun und uff’s Stockhorn. S’ganze Mittelland isch fir die Jooreszyt ungwoonter wyys ooni Nääbel. Mir stiige wyters und sueche dr erwarteti Nordoschtwind. Uff 2500 müM nämme mir Faart mit 40 km/h in Richtig Bulle uff, das isch aber mee no Weschte als erwartet. Drumm stiige mir wyter’s und per Whatsapp mäldet sich by uns dr Toni, wo momentan im Haimetli im Simmedaal isch. Mir daile iim mit, ass mir aigendligg no Zweisimme odder Gstaad wänn und är dr Apéro scho emool sell kalt stelle. Mir sin jetzt uff 3200 müM und hän e wunderbaari Sicht uff Eiger, Mench und Jungfrau, aber mir mien uns langsam entschaide ebb mir mit däm Wind wirgligg ins Simmedaal kemme. Mir stiige wyter’s und ab 3500 müM und dr Wind drait langsam ins Simmedaal yy. Uff 3600 müM hän mir denn die optimali Faartheechi erraicht. Es goot iber’s Stockhorn yyne und mir kemme eso bi Weissenburg ins Simmedaal yyne. Vor uns gseen mir scheen dr Mont Blanc und au s’Matterhorn isch ganz scheen z’gsee. Mittlerwyyle sin au anderi Balleen am Himmel z’gsee, ainigi drvo iber Château-d’Oex. Unter uns fliegt d’Rega grad ebber no Zweisimme ins Spittel und mir gssen scheen d’Pischte vo St. Sephan und wyter hinte in d’Längg. Uffgrund vo zwai Luftschichte mit unterschidliger Faartrichtig, kenne mir wunderbaar s’Dreiegg vo Saane, Gstaad und Schönried aavisiere. Wo mir iber em Rinderbärg, em Schiigebiet vo Saanemöser sin, feen mir dr Abstiig aa und mälde uns bym Flugblatz Saane. Uff 2000 müM hän mir e Gschwindigkait vo iber 50 km/h druff, drumm singge mir gschnäller, damit mir nit iber s’Daal uss faare. Uff 1500 müM dauche mir in Kaltluftsee yy und es goot numme no im Schritttämpo wyters. Wärend mir dieff iber em Schneefäld faare, kemme ainigi Fluugi iber uns yyne, wo mit em Jetset uff em Flugblatz Saane geen go Lande. Unseri Nochfaarer sind bersits scho doo und au unsere liebe Toni kunnt uns cho hälfe. Wie sich das fir e Ballon-Jetset au gheert, setze mir oberhalb vom Palace Hotel sanft uff und draage der Ballon zer nooche Stross, derte legge mir zämme und beände eso in däre tolle Winterlandschaft unseri wunderscheeni Ballonfaart. Uff em Ruggwääg geen mir natyrlig im Haimetli verbyy, wo’s Romy uns mit ganz feine Plättli duet verweene. An däre Stell nommol e härzliggs Danggerscheen fir die Gaschtfrindschaft.