D’Prognose fir das Wuchenändi sin nit grad berauschend gsii, aber am Donnschtig zaigt sich e glaini Glägehait fir am Samschtig Morge. Und wirgligg, genau vom Siibeni bis aafangs Nommidaag git’s e Fänschter wo scheens Wätter isch. Mer dräffe uns am halber Säggsi und faare ins Simmedaal no Boltige, denn mir wänn mit sem Siidweschtwind ins Mittelland uuse faare. Mir beraite unsere Ballon fir d’Faart vor und no dr Instruggtion vor de Passagier, starte mir am Zää ab Achti zer Faart. Mir stiige langsam im Daal uff und scho bald goot d’Sunne iber de erschte Krete uff. Iber uns git’s numme blaue Himmel und scho bald wo mir iber d’Kretehechi kemme, nämme mir Faart in Richtig Thun uff. Im Norde gseen mir dr Chasseral und vorne draa ligge Bieler, Neueburger und dr Murtesee. Uff 3000 müM wird dr Mont Blanc sichtbar und iber Chateau d’Oex gseen mir zwai anderi Balleen uffstiige. Mir hän jetzt flotti 40 km/h druff, aber d’Richtig isch mee nach Norde als erwartet. Drumm stiige mir wyter’s uff 3500 müM und wirgligg d’Richtig drait mee no Oschte. Eso kenne mir d’Kontrollzone vo Bärn im Siide umfaare. Aiger Mench und Jungfrau zaige sich vo dr beschte Syte und dr Thunersee kunnt langsam fiire. Mir faare ebbis nerdlig vom Stockhorn iber Gantrisch yyne no Bluemestai im Gürbedaal. Mir hän e guete Bligg uff’s Bundeshuus und Fungge mit eme Kolleeg, wo im Mittelland mit sym Ballon unterwäggs isch. Uff dr hechi vo Uetedorf kemme mir zer Trennlinie, wo dr Luftruum in dr Schwyz zwische Alpe und Mittelland trennt. Wenn mir eso wyter faare, mien mir zerscht d’Erlaubnis vo dr Fluugsicherig yyhoole. Will s’aber wyters unde ebefalls no mit 40 km/h lauft, entschaide mir uns fir e Abstiig und faare unterhalb vo 3000 müM wyters ins Ämmidaal yy. Mir kemme iber unsere Landeblatz vo dr letschte Faart bi Linde yyne und schigge unseri Nochfaarer no Wolhuuse. D’Schratteflue gseen mir jetzt in dr ganze Längi und im Oschte zaigt sich scho dr Säntis. Wo mir iber e Napf yyne kemme, gseet me näbe-n-em Sämpachersee au dr Zuger- und dr Vierwaldstättersee, mit em Biirggestogg und dr Rigi dr Keenigin vo de Alpe. Uff dr Hechi vo Wolhuuse starte mir unsere Abstiig und mache uns uff d’Suechi no-n-eme geaignete Landeblatz. No däm mir langsam iber s’Kloschter vo Werthestai faare, drybt uns dr Wind e bitzeli uff alli Sytte. Langsam goot’s iber e Baanhof vo Wolhuuse yyne und denn faare mir e Hang uufe und setzt auf ere geaignete Wiise uff. Unseri Nochfaarer sin sofort zer Stell und mir phagge alles zämme. Eso nimmt die Faart no drey Stund e Ändi und mir faare langsam widder zrugg.