In däm Joor sin mir numme fir ai Wuchenändi in Flims, will’s fir uns bald in d’Wärmi uff d’Insle goot. Mir raise dorum am Frittigmorge aa, aber fir e Aafang gseet’s Wätter nit no Ballonfaare uss. No dr Absagag vo dr Oobefaart, kunnt wärend em Nachtässe d’Mäldig, ass am Morge no digge Näbel in dr Region liggt und drum au die Faart nit ka stattfinde. Mir nämme drumm no aine odder zwai, will mr’s kenne. Am Samschtig Zoobe starte mir denn aber mit vier Passagier zer Faart im Daalkessel. Es het seer schwachi und variabli Wind und mir faare in Richtig Waldhuus. So styyge mir hecher und faare widder in Richtig Startblatz zrugg. Uff 2400 müM gseen mir scheen d’Tschingelherner und s’Martinsloch. D’Bärge rundumme sin wunderbar mit frischem Schnee verzuggeret. Iber em Startblatz singge mir rasch ab, aber es drybt uns in e falschi Richtig und so gits hitt Zobe kai Rundfäärtli. Mir faare in Richtig Murschetg und lande denn in dr Nechi vom Reschtaurant Larnags. Mir mien vorwärts mache und faare gschnäll zrugg zem Startblatz zem Tanke und verabschiide uns vo unsere Passagier. Denn goot’s an Abschlussoobe vo dr Ballonwuche. Am näggschte Morge erwartet uns e Stärnehimmel und mir fraie uns uff e scheeni Faart. Am Briefing bikemme mir die letschte Infos vom Wätterfrosch und beraite uns fir d’Faart vor. Mir starte am viertel ab Achti und gniesse aifach die wunderscheeni Bärgwält. Dr Gaumasee het nos y Morgenäbeli und au in dr Rhyschlucht het’s no die letschte Fätze. Mir styyge hecher und es mälde die erschte Balleen, ass es uff 3000 müM foot aafo laufe. Wo mir die Hechi erraiche mache mir e Faart mit 35 km/h in Richtig Länzerheid. Wyter’s oobe drait dr Wind mee no Siide und will mir uns fir e Faart ins Engadin entschliesse, blyybe mir eher uff 3000 müM und faare genau in Richtig La Punt. Mittlerwyyle hän mir e waansinnigi Ussicht uff die vyyle Bärge. Im Norde zaige sich d’Kurfirschte und dr Säntis und im Siide d’Berninagrubbe. Mir blyybe megligscht wyt eschtlig, damit mir scheen iber e Albulapass iibere kemme. Eso hän mir kaini hechere Krete im Wäg und mien eso nit wäge Turbulänze stiige. Iber em Albula mäldet sich dr Luc by Samedan Info und bestoot eso sini Funkfyyrdauffi. Är het nämmlig erscht am letschte Zyschtig sini Flugfunkbriefig abgleggt und bestande. Mir stiige e bitzeli und zyyle Bevers als Landegebiet aa. Jetzt gseen mir dr Flugblatz vo uns und mir hän e scheeni Sicht uff die drey See zwische St. Moritz und Maloya. Mir singge rassig ab und kemme iber em Baanhoof vo Bevers in d’Grundschicht. Langsam faare mir iber d’Huusdächer und setze in eme Garte sanft uff. Mir draage dr Ballon zer noche Wiise und unseri Nochfaare hän dr Wäg iber Julier au scho hinter sich brocht und sin sofort zer Stell. Mir phagge alles zämme und stosse uff die scheeni Faart aa. Mir fraie uns scho uff d’Ballonwuche 2025 und denne widder voll drby.