Mir dräffe uns am Morge frieh mit unsere Passagier und faare no Lozärn, wo mir uns vor em Verkehrshuus bym Lido mit em Deny-Joe dräffe. Mir beraite im Park unseri drey Balleen vor und hebe phunggt Siibeni ab. Scho gly iber de Baumwipfle hän mir die scheeni Kulisse vom Lozärner Seebeggi vor uns. Dr See gseet uss wie s’scheenschte Koralleriff und im Hintergrund gseen mir dr Pilatus, Birgestogg und s’Stanserhorn. Gege Brunne zue het’s no Näbelschwade wo das Ganzi zem e gewaltig mystische Momänt mache. Wo die drey Balleen gmainsam wyters stiige, goot iber dr Rigi mit eme goldige Schyyn d’Sunne uff. Mir mälde uns bym Flugblatz Emme und stiige wyter’s um in dr erwarteti Siidweschtwind z’koo. Ab 2000 Meter faare mir in Richtig Zug und wo mir uff 2500 kemme wird’s schnäller und d’Richtig goot jetzt in Richtig Aegerisee. Mittlerwyyle gseen mir die ganzi Alpeketti und im Norde liggt s’Reusstal unter eme Näbelmeer. Mir faare nerdlig vo dr Rigi dure und uff 2700 Meter hän mir 47 km/h druff. Mir singge widder e chli ab, will mir nit scho in e baar Minute in Aegeri wän sii. Eso kenne mir dä wunderscheeni Daag aifach gniesse. Es goot iber e Zugersee und denn faare mir iber e Zugerbärg no Unterägeri. Derte mien mir diefer goo, will dr Luftruum vo Ziiri aafoot und am Morge immer dr Siidaafluug aggtiv isch. Mir gseen au die neye Airbus 350 vo Edelweiss und Swiss, wo fascht uff glycher Hechi im Norde an uns verby fliege. Mir entschaide uns no iber Finschtersee uss z’faare und in dr Region vo Hütten z’lande. denn singge mir uss em Gradiäntwind und kemme iber eme Buurehoof aabe. Uff em Wäg unter uns rittet aini mit zwai Ross und mir warte uff dr Heechi, bis die ewägg sin. Mir wänn jo nit, ass die bi eme greftige Brennerstoss mitsamt iirem Gyggel uff eme Zwätschgebaum hoggt! Drno singge mir ganz ab und setze näbe nem Buurehof sanft ab. Unsere Noochfaarer isch sofort zer Stell und mir phagge alles zämme. Mir mien Eych jetzt laider entdysche, mir hän kai Blächschaade, aber unere Passagier isch aine, odder besser gsait, är spiilt in däre www.blaechschaade.ch . Im Aaschluss dräffe mir die andere Teams in dr Limihitte und dien bi eme Plättli uff die scheeni Faart aastosse.