Es isch die 50. Ballonwuche doo in Flims und ze däm Jubiläum isch natyrlig au s’entsprächende Wätter aagsait. No dämm ass es am Samschtigzoobe zwar faarbar aber nyt wirgligg scheen gsii isch, fraie mir uns um soo mee, ass am Sunntig am Moorge bym uffstoo scho d’Stärnli am Himmellychte. Mir kemme gschpannt uff d’Ballonwiise abe und beraite unsere Ballon zer Faart vor. Am Briefing sait unser Wätter Frosch Peter, ass es e Faart ins Val Lumnezia kennti gää. Mir stelle unser Ballon uff und no dämm mir unseri Passagier instruiert hän, starte mir kurz no de Achte zer Faart. Langsam stiige mir als zwaite Ballon iber dr Wiise uff und gniesse die scheeni Sicht uff Flims. Uff em Blatz kenne mir mitverfolge, wie sich die ander Balleen dien vorberaite. Iirgendwie dunnggts aim, ass gwyssi enander unhaimlig vermisst hän. Mir kenne uns ammel numme ess erklääre, wieso alli uffenander oobe hogge. Mir stiige langsam wyters und gseen scheen uff e Cresta und e Caumasee. Um die Zytt hets derte aber no kaini selfiegeile Iuutuuber wo schlannge steen! Mir sin jetzt no lycht unterhalb vo dr uffgloggerete Wulggedeggi und wo d’Sunne zu uns dureschyynt stiige mir wyters uff. Oberhalb vo dr Wulggegränze wärde mir vo-me-ne staahlblaue Himmel und ere wuderbaar wyssverzauberte Bärgwält empfange. D’Tschingelheerner mit em Martinsloch und dr Vorab ändligg emool widder wyss statt bruun. Langsam kemme mir die erwarteti Oschtnordoscht Streemig und faare mit 30 km/h no Ilanz. Uff 3200 müM hän mir e fantastischs Winterpanorama mit eme gewaltige Färnbligg. D’Richtig wäggslet uff Nordoscht und mir entschaide uns fir e wyterfaart no Vella im Lugnez. Via Ilanz faare mir ins Val Lumnezia yy und iber Dege laite mir unsere Abstiig yy. Dr Pfarrer im Daal begriesst uns fraidig mit syne Glogge. Rassig mit bis zu 5 Meter pro Sekunde singge mir ab und fange dr Ballon iber em Boode ab. Mir faare genau iber e Gloggeturm vo dr Kapälle Sogn Bistgaun bi Degen. No ere kurze Tieffaart iber e Fäld lande mir bi-n-ere scheene Wiise, grad nääbe nem Fäldwääg. Dr Start in die Wuche isch glyygt und mir sin gschpannt, was es alles no fir Faarte git.

Ändligg derfe mir no däre Coronazyt widder e Ballonstart ab em Hochstuggli mache. Nodäm mir am Samschtig beraits aagraist sin und dr Ballon mit em Ratrac ins Schiigebiet transportiert hänn, het‘s zerscht emool s‘obligate Fondue im Herreboode gää. Drno sin mir im Pulverschnee unter em ändloose Stäärnehimmel widder zer Bärgstation spaziert. Am näggschte Morge wärde mir vo eme staalblaue Himmel begriesst und no dämm mir uns am Zmoorgebiffet gsterggt hän, goot’s mit dr Hochstucklibaan dr Bärg druff. Im Aaschluss git’s no e Fuessmarsch von ere Viertelstund in Herreboode hintere. Derte beraite mir unsere Ballon fir e start vor und no neme kurze Briefing stelle mir dr Ballon uff. Gmainsam hebe alli zää Balleen ab und mir blyybe zerscht emool dief und faare in Richtig Mythe. Wo mir iber e glains Sätteli faare gseen mir scheen uff e Stoos und uff Brunne mit em Vierwaldstättersee. Mir stiige hecher und kemme in die erwarteti Biisestreemig. Mit 25 km/h faare mir in Richtig Buochs. Mir stiige no hecher und gniesse die wunderbari Sicht uff die ganzi Alpeketti. Uff 2000 Meter hän mir 30 km/h in richtig Luzärn druff. Mir mälde uns bym Flugblatz Buochs unsere Standort und blaane e Faart in’s Äntlibuech. Uff 2600 müM hän mir scho 50 km/h druff. Mir singge drumm nommol und zyyle genau dr Pilatus aa. Iber em Biggenstogg git’s denn e Balloonlifting, mir wäggsle e Gasfläsche und stiige widder hecher. Mir hän jetzt e scheene Bligg uff dr Sarnersee und scho bald sause mir iber dr Pilatus yyne. Uff dr Hechi vo Schüpfheim im Äntlibuech singge mir diefer, doch au weenige Meter iber em Boode hän mir immer no e Faart vo 25 km/h. Mir versueche e erschts Mool in eme Windschatte e scheens Blätzli fir e Landig z’finde, doch isch es seer boggig und mir bräche dä Versuech ab. S’Daal wyters hättis e scheeni Wiise fir e schnälli Landig, jedoch gseen mir derte e Kaabel vo nere Sailbaan und faare dorum wyters. Au bi Schlatt versueche mir s’nommol, aber au derte isch dr Wind no boggig, drfir wärde mir im näggschte Querdääli findig. Bi Schlatt kenne mir steehend lande und legge dr Balloon sofort ab. Aber mir hän uns trotzdämm e bitzeli verschetzt. Mir schaffe’s nit mit em Auto bis zem Ballon aane und feen dorum aa, dr Ballonkorb komplett z’entlade damit mir alles draage kenne. Zem Glygg bikemme mir denn vo zwai Yyhaimische hilf und wärde mit em Traggtor aabegfaare. E so findet die Faart iir Ändi und mir stergge uns im nooche Restaurant mit eme Bier und eme Blättli. Dangge alle wo zer Organisation vo däm scheene Aaloss byydrait hän.